ជាការពិតណាស់ កាលពីយប់ថ្ងៃទី ២៨ ខែកក្កដា ឆ្នាំ ២០២៤ វេលម៉ោង ២៤:០០ បទឈប់បាញ់ដោយគ្មានលក្ខខណ្ឌរវាងកម្ពុជា-ថៃ បានចូលជាធរមានហើយក្តី តែការឈឺចាប់នៃការបាត់បង់កងកម្លាំងពលីជូនបូរណភាពទឹកដី និង រងរបួសក៏នៅតែដក់ជាប់យ៉ាងឈឺចាប់ក្នុងចិត្តរបស់ប្រជាជនកម្ពុជា។
ក្នុងនោះដែរ ការបំផ្លិចបំផ្លាញប្រាង្គប្រាសាទព្រះវិហារ ដែលជាសម្បត្តិបេតិកភណ្ឌពិភពលោក ក៏ធ្វើឱ្យកូនខ្មែរជាច្រើនបាន និង កំពុងបន្តចែករំលែកស្រែករកយុត្តិធម៌ដូចគ្នា។
ជាក់ស្តែង ក្រឡេកទៅមើលតារាស្រី ថាច ម៉ារី កាលពីថ្ងៃទី ២៨ ខែកក្កដា ឆ្នាំ ២០២៥ កន្លងទៅនេះ នាងបានកាន់បដាសរសេរអក្សរធំៗ ឈរមុខទីស្នាក់ការ UNESCO ប្រចាំនៅកម្ពុជាដោយមោះមុត ក្នុងនាមជាកូនខ្មែរ ដើម្បីទាមទារយុត្តិធម៌នៃការបំផ្លិចបំផ្លាញប្រាសាទព្រះវិហារពីថៃ ដោយសរសេរថា៖ «Bring Justice #savepreahviheatemple Time to act now»។
គួរជម្រាបថា កាលពីថ្ងៃទី ២៤ ខែកក្កដា ឆ្នាំ ២០២៥ កន្លងទៅ យោធាថៃបានប្រើប្រាស់ អាវុធគ្រប់ប្រភេទ ដោយរាប់ទាំងគ្រាប់ផ្លោង និង ការទម្លាក់គ្រាប់បែកពីលើយន្តហោះ ប៉ះពាល់ដល់ប្រាសាទព្រះវិហារ ដែលរួមមាន ពយតាឌី កូបុរៈទី១ ទី២ ទី៣ ទី៥ ជណ្តើរខាងជើង និង តំបន់ក្បែរប្រាសាទព្រះវិហារ។ រហូតដល់ថ្ងៃទី ២៧ ខែកក្កដា ឆ្នាំ ២០២៥ កងទ័ពឈ្លានពានថៃបន្តបំផ្លិចបំផ្លាញប្រាង្គប្រាសាទព្រះវិហារ ដែលជាបេតិកភណ្ឌពិភពលោក ដែលត្រូវការពារដាច់ខាត ដោយបានបាញ់កាំភ្លើងធុនធ្ងន់ និងការបាញ់មកលើប្រាសាទព្រះវិហារ បង្កឱ្យមានការខូចខាតច្រើនកន្លែង៕
