ក្រៅពីឆក់បានការចាប់អារម្មណ៍ពីសមត្ថភាពក្នុងការផលិតវីដេអូថ្មីៗលើបណ្ដាញសង្គម អ្នកបង្កើតមាតិកាវីដេអូល្បីឈ្មោះលោក ខេមរា ក៏ត្រូវបានអ្នកគាំទ្រតាមដានពីជីវិតឯកជនទាក់ទងនឹងរឿងស្នេហារបស់លោកដែរ ដោយលោកបានបង្ហាញចំណងស្នេហ៍ជាមួយគូសង្សាររូបស្រស់ឈ្មោះ សុភ័ក្រ្តនាថ ជាង ៥ ឆ្នាំមកហើយ។
យ៉ាងណាមិញ ក្រោយសាងស្នេហាដ៏ផ្អែមល្ហែម និង មើលចិត្តគ្នាជាច្រើនឆ្នាំ មកដល់ថ្មីៗនេះ លោក ខេមរា ក៏បានធ្វើឱ្យមហាជនអ្នកគាំទ្របង្ហាញការអបអរខ្លាំង ក្រោយបានឃើញលោក និង គូស្នេហ៍ កាន់ដៃគ្នារៀបចំកម្មពិធីចូលចែចូវតាមបែបប្រពៃណី ដែលជាជំនួបរវាងគ្រួសារទាំងសងខាងពេញដោយស្នាមញញឹម។ លើសពីនេះ លោក ខេមរា ក៏បានបង្ហាញពីគម្រោងថ្ងៃមង្គលការរបស់អ្នកទាំងពីរ ដែលនឹងរៀបចំនៅដើមឆ្នាំ ២០២៦ ខាងមុខនេះដែរ។
ក្នុងនោះ លោក ខេមរា បានបង្ហោះសាររៀបរាប់លើហ្វេសប៊ុកភ្ជាប់ជាមួយរូបភាពក្នុងពិធីចូលចែចូវដោយក្ដីរំភើបថា «Finally, after 5 years… here we are ពិធីចូលចែចូវ ជំនួបរវាងចាស់ទុំទាំងសងខាង អរគុណគ្រួសារជាទីស្រឡាញ់ទាំងពីរ Save the date: 1st February 2026»៕
