មនុស្សពីរនាក់ទៅធ្វើការដូចគ្នា ចុះហេតុអ្វីម្នាក់ទៅទៀងម៉ោង ឯម្នាក់ទៀតតែងតែយឺត? ពិតប្រាកដណាស់ ធាតុពិតជាក់ស្តែង វាកើតមកពីកត្តាទម្លាប់ កាលណាយើងចេះរៀបចំបង្កើតទម្លាប់ត្រឹមត្រូវ និង ត្រៀមខ្លួនរួចរាល់សម្រាប់ថ្ងៃស្អែក ការឆ្ពោះទៅកាន់គោលដៅរមែងតែទៀងពេលជានិច្ច។ ជាក់ស្តែង រាប់តាំងពីទម្លាប់ភ្ញាក់ ទម្លាប់រៀបចំខ្លួន រហូតដល់ការចេញដំណើរ កាលណាយើងចេះត្រៀមខ្លួនរួចរាល់ ទោះកន្លែងធ្វើការឆ្ងាយប៉ុនណា ក៏យើងនៅតែអាចឆ្ពោះទៅទាន់ម៉ោងដែរ។ «ប្រជាប្រិយ» សូមលើកពីទម្លាប់ ១០ យ៉ាងមុនពេលចូលគេង ដើម្បីកែខ្លួនជាថ្មីទៅធ្វើការទាន់ម៉ោងវិញ។
១. កំណត់ម៉ោងគេងឡើងវិញ៖ ការកំណត់ម៉ោងចូលគេងទៀងទាត់ យូរៗទៅវានឹងក្លាយទៅជាទម្លាប់។ ត្រូវចូលគេងពីព្រលប់ហើយភ្ញាក់ពីព្រលឹម។ ត្រូវប្រាកដថាគេងបានគ្រប់គ្រាន់ពី ៧-៩ ម៉ោង។
២. ឱ្យខួរក្បាលសម្រាក៖ អាចជាសកម្មភាពធ្វើឱ្យអារម្មណ៍សម្រាកដូចជា អានសៀវភៅ ងូតទឹកក្តៅឧណ្ហៗ ឬ សមាធិ…ជាដើម។
៣. កំណត់ការមើលអេក្រង់ឧបករណ៍អេឡិចត្រូចនិច៖ ពន្លឺពណ៌ខៀវចេញពីអេក្រង់ឧបករណ៍អេឡិចត្រូនិច ដូចជា ទូរស័ព្ទ ទូរទស្សន៍ ថាប្លេត និង កុំព្យូទ័រ អាចធ្វើឱ្យលែងងងុយ។ ដូចនេះ ត្រូវនៅឱ្យឆ្ងាយពីឧបករណ៍ទាំងនេះហោចណាស់ ១ ម៉ោងមុនពេលចូលគេង។
៤. រៀបចំសម្រាប់ថ្ងៃបន្ទាប់៖ រៀបចំរបស់របរសម្រាប់ថ្ងៃស្អែកឱ្យរួចរាល់ មិនថាសម្លៀកបំពាក់ កាបូបធ្វើការ រួមទាំងគិតគូរឱ្យហើយនូវអាហារសម្រាប់ពេលថ្ងៃត្រង់។ ការធ្វើដូចនេះ ជួយសន្សំសំចៃពេលនៅពេលភ្ញាក់ឡើង ម្យ៉ាងវានឹងមិននាំឱ្យឆោឡោពេលរៀបចំខ្លួន ក៏ដូចជាភ្លេចនេះភ្លេចនោះពេលទៅដល់កន្លែងធ្វើការ។
៥. ដាក់ម៉ោងរោទ៍៖ ទម្លាប់ដាក់ម៉ោងរោទ៍ត្រឹមតែពីរដង មួយជាម៉ោងដាស់ និង មួយទៀតជាម៉ោងក្រើនរម្លឹក។ កាលណាដាក់តែពីរដង វាជួយបង្ខំឱ្យឆាប់ក្រោក ហើយក៏បង្ខំឱ្យឆាប់រៀបចំខ្លួន។
៦. ជៀសវាងផឹកកាហ្វេ និង ញុំាអាហារពិបាករំលាយ ៖ ការផឹកកាហ្វេមុនពេលចូលគេង និង ញុំាអាហារដែលពិបាករំលាយដូចជា ប៊ឺហ្គឺរ ភីហ្សា ឬនំប៉័ង សុទ្ធតែរំខានដល់ការគេង។
៧. ធ្វើឱ្យបន្ទប់មានផាសុកភាព៖ ត្រូវប្រាកដថាបន្ទប់គេងរបស់អ្នកស្ងប់ស្ងាត់ ងងឹង និងបរិយាកាសល្អ។ កាលណាបន្ទប់គេងមានផាសុកភាព វាជួយឱ្យការគេងឆាប់លក់ ហើយភ្ញាក់ឡើងមកមានអារម្មណ៍ស្រស់ស្រាយ។
៨. ផឹកទឹកឱ្យបានច្រើន៖ អំឡុងពេលថ្ងៃត្រូវផឹកទឹកឱ្យបានច្រើន ប៉ុន្តែមុនពេលចូលគេង ត្រូវផ្អាកផឹកទឹកហោចណាស់ពីរម៉ោងមុនដំណេក ដើម្បីជៀសវាងក្រោកនោមនៅពេលយប់។ ការក្រោកនោមអាចធ្វើឱ្យលែងងងុយផងដែរ។
៩. ហាត់ប្រាណជាប្រចាំ៖ មិនថារវល់ប៉ុនណា អ្នកគួរឆ្លៀតធ្វើលំហាត់ប្រាណឱ្យបានទៀងទាត់ តែត្រូវជៀសវាងការធ្វើលំហាត់ប្រាណបែបខ្លាំងៗនៅកៀកម៉ោងចូលគេង។
១០. ជៀសវាងគេងថ្ងៃជ្រុល៖ បើល្វើយខ្លាំង អ្នកអាចទម្រេតខ្លួនបិទភ្នែកមួយស្រលេត តែកុំសំងំយូររហូតច្រើនម៉ោង ព្រោះវាអាចបណ្តាលឱ្យលែងងងុយនៅពេលយប់៕
