បើទោះឆាកប្រកួតបវរកញ្ញាជាច្រើននៅក្នុងប្រទេសកម្ពុជា បានបើកដំណើរការនៃការប្រកួតស្វែងរកជើងខ្លាំងទៅកាន់ឆាកអន្តរជាតិតំណាងប្រទេសក្តី ងាកមកកាន់បវរកញ្ញាស្រស់សោភា កុយ អេនណា ក៏ហាក់មិនអើពើវិលចូលការប្រកួតដែរ ដោយកញ្ញាធ្លាប់បញ្ជាក់ថាមិនទាន់ដល់ពេល។
យ៉ាងណាមិញ ងាកមកកាន់ការងារប្រចាំថ្ងៃវិញ កញ្ញា កុយ អេនណា ក៏មមាញឹកខ្លាំងណាស់ដែរ ដោយពីមួយថ្ងៃទៅមួយថ្ងៃ នាងទទួលបានការងារហូរចូលជាបន្តបន្ទាប់ក្នុងការថតផ្សព្វផ្សាយឱ្យក្រុមហ៊ុន និង ផលិតផលនានា។ លើសពីនោះ នាងក៏ជាទូតសុឆន្ទៈរបស់ក្រុមហ៊ុនជាច្រើនដែរ។
ដោយឡែក អ្វីដែលកាន់តែគួរឱ្យចាប់អារម្មណ៍នោះ មួយរយៈចុងក្រោយនេះ បវរកញ្ញាស្រស់សោភាខាងលើ បានធ្វើឱ្យអ្នកគាំទ្របង្ហាញក្តីស្រឡាញ់កាន់តែខ្លាំងដល់កញ្ញា កុយ អេនណា ខណៈនាងតែងតែថតបង្ហាញពីអរិយធម៌ វប្បធម៌ និង តំបន់ទេសចរណ៍នានារបស់កម្ពុជា តាមរយៈវីដេអូ និង រូបភាពជាបន្តបន្ទាប់៕
