ថ្មីៗកន្លងទៅនេះ តារាសម្ដែងវ័យក្មេង ជី ឈីងលីន បានធ្វើឱ្យមហាជនអ្នកគាំទ្រផ្ទុះចាប់អារម្មណ៍ចែករំលែក និង ភ្ញាក់ផ្អើលខ្លាំង បន្ទាប់ពីឃើញនាងបង្ហោះរូបភាពស្នាមរបួសលើដងខ្លួន និង មុខ រួចប្រកាសបញ្ចប់ទំនាក់ទំនងជាមួយអតីតសង្សារដែលគេស្គាល់ថាជាតារាចម្រៀងមួយរូប ក្រោយពីនាងអត់ទ្រាំលើទង្វើមិនឱ្យតម្លៃរបស់អតីតសង្សារជាច្រើនកន្លងមក។
តាមរយៈការបង្ហោះសារ ក៏ដូចជាការឡាយវីដេអូរបស់តារាសម្ដែងវ័យក្មេងរូបនេះ បានឱ្យដឹងថារវាងនាង និង អតីតសង្សាររូបនោះ បានបញ្ចប់ទំនាក់ទំនងជាមួយគ្នាតាំងពីប៉ុន្មានខែមកហើយ ដោយពេលនេះនាងក៏មានដៃគូថ្មី ប៉ុន្តែដោយសារតែអតីតសង្សារចូលមករញ៉េរញ៉ៃក្នុងជីវតនាងជាថ្មី រហូតនាងដាច់ចិត្តបង្ហោះទម្លាយរឿងរ៉ាវ និង ទង្វើមិនឱ្យតម្លៃរបស់អតីតសង្សារមកបង្ហាញលើបណ្ដាញសង្គម។
ក្នុងនោះ តារាសម្ដែងស្រី ជី ឈីនលីន បានបង្ហោះរៀបរាប់ភ្ជាប់ជាមួយរូបភាពស្នាមរបួសថា ៖ «សម្រាប់ខ្ញុំប៉ុណ្ណឹងក៏គ្រប់គ្រាន់សម្រាប់ការបញ្ចប់នូវទំនាក់ទំនងមួយនេះ ហើយក៏គ្មានថ្ងៃដែលខ្ញុំទៅយកសំរាមត្រឡប់មកចូលផ្ទះវិញដែរ ហើយក៏គ្មានអ្វីដែលខ្ញុំត្រូវស្ដាយស្រណោះដែរ ដែលខ្ញុំត្រូវបាត់បង់មនុស្សដែលមើលមិនឃើញពីតម្លៃខ្ញុំបែបនេះ ពីមុនអាចនឹងមកពីខ្ញុំស្រឡាញ់គេខ្លាំងពេក ទើបតែងតែទ្រាំនូវទង្វើដ៏សែនថោកទាបមួយនេះ រហូតមកស្ទើរតែបាត់បង់ជីវិត បាត់បង់ទាំងភាពកក់ក្ដៅសម្រាប់គ្រួសារ ល្មមភ្ញាក់ខ្លួនហើយថាកំពុងតែព្យាយាមឱ្យគេស្គាល់សណ្ដានអ្នកកាន់តែច្បាស់ហើយ គួរឱ្យសង្វែកខ្លួនអត់? កុំបាច់ខំអីទោះជានៅក្នុងលោកនេះសល់តែនាក់ម្នាក់ ក៏ខ្ញុំអត់យកជីវិតរបស់ខ្ញុំទៅផ្ញើលើដៃមនុស្សដូចអ្នកទៀតដែរ ព្រោះខ្ញុំបានកាត់អ្នកចេញពីបេះដូងខ្ញុំ តាំងពីថ្ងៃដែលដឹងថាអ្នកព្យាយាមបំផ្លាញខ្ញុំគ្រប់វិធី សុំយាយប៉ុណ្ណឹងសិនចុះ។
ខ្ញុំអត់មានត្រូវជាអី ឬទាក់ទងជាមួយម្នាក់នេះទៀតទេ កុំមករញ៉ៃរញ៉ៃជាមួយជីវិតខ្ញុំទៀត ព្រោះវាអត់តម្លៃសោះ យល់នៅប៉ុណ្ណឹង សំរាមទោះគេរើសយកមកលាងសំអាតម៉េច ក៏វានៅតែមានក្លិនស្អុយរលួយដែរ។ មុនខ្ញុំបើកចិត្តយកអ្នកថ្មី ខ្ញុំយំខ្ញុំឈឺស្ទើរតែគ្មានជីវិតរស់នៅបន្ត អ្នកនៅឯណា? អ្នកកំពុងអោបស្រី គេមកប្រាប់ខ្ញុំឃើញអ្នកទៅផ្ទះសំណាក់ជាមួយស្រី ផ្លូវចិត្តខ្ញុំខ្ទេចអស់ហើយ ខ្ញុំមិនផុសមិនបង្ហោះ ខ្ញុំខ្មាស់គេ មនុស្សធ្លាប់ស្រលាញ់តែចុងក្រោយអ្នកមិនគិតដូចខ្ញុំ អ្នកចង់បំផ្លាញខ្ញុំ ទាំងខ្ញុំមិនខុស វាលើសពេកហើយ។
ហើយកុំយករឿងអតិតខ្ញុំមកយាយ ព្រោះវាគ្រាន់តែជារឿងអតិត ដឹងត្រឹមថាខ្ញុំអត់ចេះរស់នៅដោយសារមនុស្សប្រុសទេ វាថោក កុំព្យាយាមបង្ហាញចរិតកាន់តែគួរឱ្យសង្វេគអី ព្រោះអ្នកបំភ្លៃ និង កុហកគេបាន តែអត់អាចកុហកខ្លួនឯងបានទេ ខ្ញុំសុំដើរចេញទាំងស្ងប់ស្ងាត់ ខ្ញុំចង់ប្រើជីវិតមួយដែលមានមនុស្សប្រុសម្នាក់ល្អ ដែលគេមើលឃើញពីតម្លៃខ្ញុំច្បាស់ ហើយស្រឡាញ់ខ្ញុំដោយទង្វើ តែអ្នកមិនព្រមចប់ទេចឹងខ្ញុំមិនលាក់រឿងនឹងទៀតទេ នៅមានភាគតទៀត គ្រប់យ៉ាងគឺខ្ញុំអត់ចង់បង្ហាញទេ តែអ្នកជាអ្នកបង្ខំខ្ញុំ ហើយខ្ញុំក៏អត់ចង់ឱ្យមនុស្សដូចអ្នកទៅធ្វើរឿងចឹងទៀតដាក់មនុស្សស្រីដែលគេជ្រើសយកអ្នកចូលក្នុងជីវិតបន្ត»៕
