ជាការពិតណាស់ មហាជនអ្នកគាំទ្រតារាចម្រៀងរ៉េបផ្នែកនារី កញ្ញា តី ច្បាស់ជាបានដឹងខ្លះមកហើយ នៃដំណើរដើមទងនៃការបោះជំហានក្នុងវិថីសិល្បៈរបស់នាង។
គេចាំបានថា កញ្ញា តី បានចូលប្រឡូកក្នុងវិស័យសិល្បៈដំបូង គឺជាអ្នករាំប្រចាំក្រុមរបស់អ្នកនាង មាស សុខសោភា ក្រោយមកដោយមានសមត្ថភាពផ្នែកចម្រៀង កញ្ញា តី ក៏បានវិវត្តន៍ខ្លួនមកជាតារាចម្រៀងរ៉េប។ កាលនោះ បទចម្រៀងរ៉េបដំបូងដែលកញ្ញា តី បានបកស្រាយ និង ចាប់ផ្តើមទទួលបានការគាំទ្រតែម្តងគឺបទ «តី វាយម៉ាលុយ»។
ដោយឡែក ក្រោយមានឈ្មោះជាតារាចម្រៀងរ៉េបផ្នែកនារីហើយនោះ ប៉ុន្មានឆ្នាំចុងក្រោយនេះ កញ្ញា តី កាន់តែធ្វើឱ្យអ្នកគាំទ្រវិស័យចម្រៀងរ៉េប មើលឃើញពីសមត្ថភាពដ៏លេចធ្លោរបស់នាង ខណៈបច្ចុប្បន្នវិតារាចម្រៀងរ៉េបផ្នែកនារីនៅកម្ពុជាមានចំនួនតិចបំផុត។ យ៉ាងណាក៏ដោយ បើទោះជាមានតារាចម្រៀងរ៉េបផ្នែកនារីតិចក៏ពិតមែន ប៉ុន្តែកញ្ញា តី ក៏មានសមត្ថភាពមិនចាញ់តារាចម្រៀងរ៉េបផ្នែកបុរសនោះដែរ។
អ្វីដែលកាន់តែគួរឱ្យកត់សម្គាល់ ទន្ទឹមនឹងទទួលបានប្រជាប្រិយភាពពីវិស័យចម្រៀងរ៉េបហើយនោះ ថ្មីៗនេះ កញ្ញា តី ក៏មានឱកាសបានក្តោបតំណែងជាពិធិការិនីបន្ថែមទៀត ក្នុងកម្មវិធីប្រកួតចម្រៀងរ៉េបមួយ ដោយការបង្ហាញសមត្ថភាពជាពិធីការិនីនេះ ក៏កាន់តែធ្វើឱ្យអ្នកគាំទ្រសរសើរពីទេពកោសល្យរបស់នាង ដែលតែងតែទទួលយកនូវបទពិសោធន៍ថ្មីជានិច្ចនៅលើវិថីសិល្បៈ៕
