កាលពីពេលថ្មីៗនេះ មហាជនអ្នកលេងបណ្តាញសង្គមហ្វេសប៊ុក ជាពិសេសអ្នករស់នៅក្នុងខេត្តបាត់ដំបង មានការភ្ញាក់ផ្អើលយ៉ាងខ្លាំង ក្រោយទទួលបានដំណឹងនៃការឆាបឆេះនៅផ្សារ ហេង ឆាយលី ស្ថិតក្នុងក្រុមទី ១២ ភូមិព្រែកមហាទេព សង្កាត់ស្វាយប៉ោ ក្រុងបាត់ដំបង ខេត្តបាត់ដំបង។ ករណីខាងលើនេះ បានកើតឡើងកាលពីយប់ថ្ងៃទី ២៣ ខែតុលា ឆ្នាំ ២០២៥ ម៉ោង ២៣ និង ៤៥ នាទី។
ក្នុងគ្រោះអគ្គិភ័យនេះ បានបង្កការខូចខាតអគារផ្សារទំនើប ហេង ឆាយលី ចំនួន ២៣ ល្វែង កម្ពស់ ៤ ជាន់ និង លំនៅដ្ឋានមួយចំនួននៅក្បែរនោះផងដែរ ហើយរហូតដល់ព្រឹកថ្ងៃទី ២៤ ខែតុលា ឆ្នាំ ២០២៥ នេះ សមត្ថកិច្ចនៅបន្តការងារនេះនៅទីតាំងឆេះនៅឡើយ ខណៈមូលហេតុដែលបង្កឱ្យមានគ្រោះអគ្គិភ័យនេះ និង ទំហំនៃការខូចខាតទ្រព្យសម្ភារពិតប្រាកដ កំពុងស្ថិតក្នុងការស្រាវជ្រាវ។
ចំពោះករណីនេះ មហាជនបាននាំគ្នាចូលរួមសម្ដែងក្ដីសោកស្ដាយ ចំពោះម្ចាស់ផ្សារទំនើប ដែលក្រោយជ្រាបដំណឹងនេះ លោកបានស្រែកទ្រហោយំ សោកស្តាយជាអនេក ដែលភ្លើងកំណាចឥតមេត្តា បានលេបត្របាក់យកសមិទ្ធផល ដែលលោកខិតខំតស៊ូកសាង និង លក់ដូរមកអស់រយៈពេលរាប់សិបឆ្នាំ គួរឱ្យសោកសង្រេងបំផុត។
បើតាមការបញ្ចេញមតិនានាពីមហាជនរស់នៅខេត្តបាត់ដំបង និង អ្នកបានស្គាល់ម្ចាស់ផ្សារទំនើបខាងលើនេះ បាននិយាយដូចៗគ្នាថា ក្រុមគ្រួសាររបស់ម្ចាស់ផ្សារ ហេង ឆាយលី ជាមនុស្សចិត្តល្អ មិនគួរណារឿងអាក្រក់កើតឡើងសោះ។ លើសពីនោះ មានទាំងអតីតបុគ្គលិក អ្នកស្គាល់ និង មហាជនជាច្រើន ស្នើចង់ឱ្យម្ចាស់ហាងផ្សារទំនើបខាងលើ បើកទទួលជំនួយ ដើម្បីជួយសម្រាលបន្ទុក និង ដូចជាការលើកទឹកចិត្តក្នុងការបាត់បង់នេះ៕
