កាលពីថ្ងៃទី ២៧ ខែតុលា ឆ្នាំ ២០២៥ កន្លងទៅនេះ តាមរយៈសារព័ត៌មាន Khaosod បានរាយការណ៍ភាពអសន្តិសុខដែលបានកើតឡើងនៅខេត្តណារ៉ាធីវ៉ាតជាថ្មី ដោយមានការបំផ្ទុះឡានរបស់ក្រុមអ្នកដើរល្បាត បណ្តាលឱ្យស្លាប់អស់ ១ នាក់ និង របួសចំនួន ៣ នាក់។
តាមព័ត៌មានបានឱ្យដឹងថា ហេតុការណ៍បានកើតឡើងនៅម៉ោង ៣:៣៥ រសៀល ថ្ងៃទី ២៧ ខែតុលា ឆ្នាំ ២០២៥ នៅផ្លូវមួយកន្លែងនាស្រុករឺសោះ ខេត្តណារ៉ាធីវ៉ាត ដោយជនឧទ្ទាមបានលួចលាក់បង្កប់ឧបករណ៍បំផ្ទុះនៅក្នុងនៅក្នុងធុងហ្គាសទម្ងន់ ៥០ គីឡូក្រាម ដើម្បីបំផ្ទុះឡានរបស់ក្រុមអ្នកដើរល្បាតស័្មគ្រចិត្តមួយគ្រឿង ដែលធ្វើដំណើរនៅតាមផ្លូវនេះ។
ជាលទ្ធផលឡានរបស់ក្រុមអ្នកដើរល្បាត បានផ្ទុះក្រឡាប់មួយទំហឹងបណ្តាលឱ្យទាហានល្បាត ១ នាក់បានបាត់បង់ជីវិត និង ៣ នាក់ទៀតបានរងរបួស។ ក្នុងនោះ នៅជិតកន្លែងកើតហេតុគេបានប្រទះឃើញរណ្តៅគ្រាប់បែកមួយទៀតដែលមានជម្រៅ ១ ម៉ែត្រ និង ទទឹង ២ ម៉ែត្រ ហើយអាជ្ញាធរក៏បានធ្វើការបិទតំបន់ខាងលើជាបណ្តោះអាសន្ន ដើម្បីត្រួតពិនិត្យបន្ថែមផងដែរ៕
ប្រភព៖ Khaosod
