មហាជននិយមតាមដានខ្សែភាពយន្តខ្នាតធំរបស់ផលិតកម្មរស្មីហង្សមាស ច្បាស់ជាបានជ្រាបមកហើយពីវិសាលភាពនៃភាពល្បីល្បាញខ្ទរខ្ទារនៃភាពយន្ត «នេសាទក្រពើ» ដែលមានការនិពន្ធ និង ដឹកនាំដោយ ឯកឧត្តម ម៉ៅ អាយុទ្ធ កាលលោកនៅមានជីវិត។ ភាពយន្តខ្នាតធំ «នេសាទក្រពើ» នេះដែរ បានចាក់បញ្ចាំងតាំងពីអំឡុងខែតុលា ឆ្នាំ ២០០៥ មកម្ល៉េះ។
ជាការពិត បើទោះជាភាពយន្ត «នេសាទក្រពើ» បានចាក់បញ្ចាំងតាំងពីអំឡុងឆ្នាំ ២០០៥ មកក្តី តែភាពយន្តខ្នាតធំ ដែលមានការសម្តែងដោយឧកញ៉ា ព្រាប សុវត្ថិ, លោកជំទាវ ស៊ឹម សូលីកា និង សិល្បករល្បីៗជាច្រើនទៀតនោះ នៅមិនទាន់បែកធ្លាយសាច់រឿងជាសាធារណនៅឡើយនោះទេ ពោលគឺភាពយន្ត «នេសាទក្រពើ» ត្រូវបានចាក់បញ្ចាំងតែនៅក្នុងរោងភាពយន្តតែប៉ុណ្ណោះ។
យ៉ាងណាមិញ រំលងផុតអស់រយៈពេលជាច្រើនឆ្នាំហើយនោះ ស្រាប់តែថ្មីៗនេះ លោកស្រី អ៊ឹង គីមលាង កូនស្រីថៅកែផលិតកម្មរស្មីហង្សមាស បានបង្ហោះសារគួរឱ្យចាប់អារម្មណ៍មួយនៅលើហ្វេសប៊ុក ដោយលោកស្រីបង្ហើបចង់សុំឪពុកឱ្យចាក់បញ្ចាំងភាពយន្ត «នេសាទក្រពើ» ម្តងទៀត។
ក្នុងនោះ លោកស្រី អ៊ឹង គីមលាង បានរៀបរាប់ថា៖ «ជម្រាបសួរបងប្អូនទាំងអស់គ្នា! តើនៅចាំរឿង នេសាទក្រពោះ ឫអត់? បើមានបងប្អូន share ច្រើន ខ្ញុំទៅបបួលប៉ាខ្ញុំឱ្យចាក់នៅរោងកុនឡើងវិញម្តងទៀត»។ ភ្លាមនោះ មិនបង្អង់យូរគេបានឃើញអ្នកលេងបណ្តាញសង្គមជាច្រើន បានចូលទៅបញ្ចេញមតិគាំទ្រ និង ទទូចចង់ឱ្យមានការចាក់បញ្ចាំងរឿងនេះជាថ្មីម្តងទៀត៕
