ថ្មីៗនេះ វីដេអូដំរីរត់ទៅឃាត់អ្នកមើលថែ រារាំងមិនឱ្យចាកចេញបានកំពុងធ្វើឱ្យមហាជនលើបណ្តាញសង្គមរំជួលចិត្តជាខ្លាំង។ ជាការពិតណាស់ ដំរីឈ្មោះឡាក់គី ត្រូវបានលោក ទ្រី ស៊ីថេង មើលថែអស់រយៈពេលជិត ៣០ ឆ្នាំ នៅលើទឹកដីភ្នំតាម៉ៅ ហើយឥលូវនេះលោកបានលាឈប់ពីការងារ លែងមើលថែតទៅទៀតហើយ។
លោក ទ្រី ស៊ីថេង បានចូលបម្រើការងារនៅសួនសត្វភ្នំតាម៉ៅនៅឆ្នាំ ១៩៩៥។ ដំបូងឡើយ លោកធ្វើការជាអ្នកជីក និង រែកដី ដោយគិតកម្រៃជាម៉ែត្រគុប។ ក្នុង ១ ម៉ែត្រគុប ២៥០០ រៀល។ ក្រោយមកទៀត ធ្វើការគិតកម្រៃជាថ្ងៃវិញ ដោយក្នុងមួយថ្ងៃ ៣០០០ រៀល។ ចំណែកបាយទឹកគឺត្រូវរៀបចំដោយខ្លួនឯង។
មុនពេលជួបដំរីឡាក់គី លោកបានមើលថែសត្វប្រភេទផ្សេងៗដូចជា សត្វស្លាប ខ្លា និង ខ្លាឃ្មុំជាដើម។ លោកបានជួប និង សង្គ្រោះដំរីឡាក់គីនៅថ្ងៃទី ២៣ ខែ កក្កដា ឆ្នាំ ១៩៩៩ ដែលគ្រានោះវាបានមកដល់នៅពេលយប់។ លោកបានឃើញវាហេវហត់ខ្លាំង ហើយលោកបានផ្តល់អាហារឱ្យវាជាទឹកដោះគោ ដោយប្រើទឹកដោះគោខាប់កំប៉ុងឆុងជាមួយទឹក។ លោកថា គ្រាន់តែឆុងឱ្យវាបៅបានម្តងគត់ វាចាត់ទុកលោកដូចជាមេរបស់វាភ្លាម។
ក្រោយឃើញបែបនេះ លោកប្រធានសួនសត្វភ្នំតាម៉ៅបានផ្តល់តួនាទីឱ្យលោកជាអ្នកមើលថែកូនដំរីនេះតែម្តង។ លោកថា កាលជួបដំរីឡាក់គីដំបូង វាមានអាយុប្រហែល ៦ ខែ មិនទាន់ចេះស៊ីអ្វីដោយខ្លួនឯង ដូច្នេះ លោកបានផ្តល់អាហារជាបបរ និង ម្សៅទឹកដោះគោក្នុងមួយថ្ងៃមួយកំប៉ុង។
លោកថាដំរីឡាក់គីតាមលោកស្អិតណាស់ វាតាមទាំងថ្ងៃ ទាំងយប់ សូម្បីលោកចេញទៅរកឧសដុត និង ទៅលេងផ្ទះ ក៏វាតាមទៅដែរ។ លើសពីនេះ ឱ្យតែបាត់មុខលោកគឺមិនបាន ដឹងតែស្រែកយំគ្រប់ពេល។
ចំពោះផលវិបាកក្នុងការធ្វើចំណី លោកថានៅរដូវវស្សា ពេលមានភ្លៀងធ្លាក់ច្រើនថ្ងៃជាប់គ្នា វាពិបាកក្នុងការប្រើភ្លើងចម្អិន ជួនត្រូវធ្វើបបរតាំងពីម៉ោង ៦ ព្រឹករហូតដល់ម៉ោង ១១-១២ ថ្ងៃត្រង់ទើបឆ្អិន។
លោកថា ដំរីឡាក់គី មានប្រវត្តិកម្សត់ណាស់ កំព្រាម្តាយដោយសារការបរបាញ់។ អ្នកប្រមាញ់បានបាញ់ម្តាយវាឱ្យស្លាប់ ដើម្បីចង់បានកូនដំរី។
លោក ទ្រី ស៊ីថេង មិនត្រឹមតែមើលថែប៉ុណ្ណោះទេ តែលោកថែមទាំងចាត់ទុកដំរីឡាក់គីដូចជាកូនផងដែរ។ លោកផ្តល់អាហារ ទៅណាមកណាជាមួយគ្នា និង បង្រៀនឱ្យចេះស៊ីចំណីតាំងពីតូចរហូតដល់ធំ។
បច្ចុប្បន្ន ដំរីឡាក់គី មានអាយុ ២៦ ឆ្នាំ។ រៀងរាល់ឆ្នាំ លោកតែងយកថ្ងៃទី ២៣ ខែ កក្កដា ជាថ្ងៃដែលលោកជួបវាដំបូង សម្រាប់ជាថ្ងៃខួបកំណើតរបស់វា។ យ៉ាងណាមិញ មកដល់ថ្ងៃទី ៣០ ខែមិថុនា ឆ្នាំ ២០២៥ នេះ លោកបានសម្រេចចិត្តលាឈប់ពីការងារ និង លែងមើលថែដំរីនេះតទៅទៀត៕
