ថ្មីៗនេះ មន្រ្តីអាជ្ញាធរនៅថៃ បានចុះទៅចាប់កន្លែងលក់កញ្ឆាមួយកន្លែងក្នុងទីក្រុងបាងកក ដែលបានផលិតចាហួយផ្សំកញ្ឆាលក់ខុសច្បាប់ ក្រោយពីមានក្មេងអាយុ ២ ឆ្នាំម្នាក់បានញ៉ាំដោយចៃដន្យ ហើយត្រូវធ្លាក់ខ្លួនឈឺរហូតមន្ទីរពេទ្យ។
តាមព័ត៌មានបានឱ្យដឹងថា ក្រោយពីមានករណីក្មេងអាយុ ២ ឆ្នាំម្នាក់ឈឺចូលមន្ទីរពេទ្យ ដោយសារតែការញ៉ាំចាហួយផ្សំកញ្ឆា ខាងមន្រ្តីពាក់ព័ន្ធក៏បាននាំគ្នាស្រាវជ្រាវ និង ចុះចាប់ចាប់កន្លែងផលិតចាហួយខាងលើ ដែលគ្មានអាជ្ញាប័ណ្ណ ហើយរឹបអូសបានចាហួយផ្សំកញ្ឆាចំនួន ២៣០ កញ្ចប់ នំឃុកគីផ្សំកញ្ឆា ១៦២ នំ កញ្ឆាក្រៀមចំនួន ៣៥ ថង់ ដើមកញ្ឆាស្រស់ចំនួន ៥៤ ដើម សរុបជាទឹកប្រាក់គឺ ១ លានបាត។ ហើយអ្វីដែលគួរឱ្យហួសចិត្តនោះ កន្លែងខាងលើនេះបានប្រើបន្ទប់ទឹកសម្រាប់លាយរូបមន្តផលិតចាហួយ និង នំឃុកគីខាងលើទៀតផង។
ដោយឡែក ម្ចាស់ការផលិតនេះ នឹងត្រូវអាជ្ញាធរចោទប្រកាន់ពីបទការផលិត និងលក់អាហារដែលមានស្លាកសញ្ញាមិនត្រឹមត្រូវ ចំណីអាហារមិនបរិសុទ្ធ (ប្រសិនបើមានផ្ទុកសារធាតុគ្រោះថ្នាក់) និង លក់ឱសថបុរាណដោយគ្មានអាជ្ញាប័ណ្ណ៕
ប្រភព៖ Khaosod
