នៅរសៀលថ្ងៃទី ៣០ ខែតុលា ឆ្នាំ ២០២៥ នេះ ធនាគារជាតិនៃកម្ពុជា បានចេញសេចក្តីបំភ្លឺព័ត៌មាន ទាក់ទងនឹងការផ្សព្វផ្សាយតាមបណ្តាញសង្គម អំពីវត្តមានមាសសន្លឹក ដែលមាននិមិត្តសញ្ញា (logo) របស់ធនាគារជាតិនៃកម្ពុជា។
ធនាគារជាតិ បានឱ្យដឹងថា នាពេលថ្មីៗនេះ មានការផ្សព្វផ្សាយនៅតាមបណ្តាញសង្គមហ្វេសប៊ុក អំពីវត្តមានមាសសន្លឹក ដែលមាននិមិត្តសញ្ញា (logo) របស់ធនាគារជាតិនៃកម្ពុជា និង មានភ្ជាប់ការអត្ថាធិប្បាយថាជាមាស ដែលចេញពី «ធនាគារខ្មែរពិតៗ»។
ចំពោះករណីនេះ ធនាគារជាតិបានបញ្ជាក់ជូនថា ធនាគារជាតិនៃកម្ពុជា មិនដែលបោះផ្សាយមាសនោះទេ ហើយការប្រើប្រាស់និមិត្តសញ្ញា និង ឈ្មោះរបស់ធនាគារជាតិនៃកម្ពុជា ដោយមិនមានការអនុញ្ញាត គឺជាទង្វើខុសច្បាប់។ រាល់ការទិញ-លក់ផលិតផលធ្វើពីមាស និង លោហធាតុមានតម្លៃ គឺជាការទទួលខុសត្រូវផ្ទាល់របស់អ្នកធ្វើប្រតិបត្តិការទិញ-លក់៕
