ប្រផ្នូលល្អ! នៅសៀមរាប មានពលរដ្ឋប្រទះឃើញ ប្រាសាទចំណាស់មួយ លាក់ខ្លួននៅក្រោយចម្ការរបស់អ្នកភូមិ

មហាជនអ្នកប្រើប្រាស់បណ្ដាញសង្គម បាននាំគ្នាផ្ទុះការចាប់អារម្មណ៍ និង ចែករំលែកបន្តគ្នាព្រោងព្រាត បន្ទាប់ពីមានការបង្ហោះពីករណីប្រទះឃើញប្រាសាទចំណាស់លាក់ខ្លួនមួយកន្លែង នៅក្រោយចម្ការអ្នកភូមិ ស្ថិតក្នុងភូមិសាស្ត្រខេត្តសៀមរាប។

តាមរយៈគណនីដែលមានឈ្មោះ Norn Manon នៅថ្ងៃទី ២៦ ខែសីហា ឆ្នាំ ២០២៥ បានបង្ហោះរូបភាពទិដ្ឋភាពទីតាំងប្រាសាទ ព្រមទាំងបញ្ជាក់ឱ្យបានដឹងថា មានការប្រទះឃើញប្រាសាទដ៏កម្សត់មួយ លាក់ខ្លួនក្រោយចម្ការអ្នកភូមិ ពុំមានអ្នកដឹងថតបង្ហាញទេ ខណៈប្រាសាទនេះមានចម្ងាយពីផ្លូវប្រហែល ៥០០ ម៉ែត្រ ស្ថិតនៅភូមិអូររូង ឃុំតាសៀម ស្រុកស្វាយលើ ខេត្តសៀមរាប។

តាមប្រភពខាងលើ បានបញ្ជាក់ពីលក្ខណៈពិសេសមួយចំនួននៃប្រាសាទឱ្យបានដឹងថា នេះជាប្រភេទប្រាសាទទោល (ប្រាង្គតែមួយ) សង់ពីឥដ្ឋបែរទៅទិសខាងកើត ខូចខាតផ្នែកកំពូលបន្តិច ឥដ្ឋនៃប្រាង្គខាងក្រៅរបេះធ្លាក់ច្រើន ដោយសារឫសដើមជ្រៃចាក់រុំព័ទ្ធ ប៉ុន្តែខាងក្នុងនៅស្អាត។ ចំពោះបំណែកផ្តែរ និង ត្របកផ្កាឈូកនៃកំពូលមិនបាត់បង់ទេ ខណៈផ្នែកផ្សេងមិនឃើញដោយសារព្រៃដុះក្រាស់ពេកពិបាកពិនិត្យមើល៕