ថ្មីៗនេះ មជ្ឈមណ្ឌលបង្ការជំងឺអេដស៍ខេត្តយូណាន ប្រទេសចិន បានទម្លាយពីករណីមួយដែលបុរសជាប្តីកុហកប្រពន្ធថាកើតជំងឺថ្លើម ទាំងដែលការពិតមានផ្ទុកជំងឺអេដស៍។
តាមព័ត៌មានបានឱ្យដឹងថា ប្តីប្រពន្ធទាំងគូនេះ បានរៀបការជាមួយគ្នាមកជាច្រើនឆ្នាំហើយ ប៉ុន្តែមិនមានកូននោះទេ។ តាំងពីរៀបការមក នាងតែងឃើញប្តីលេបថ្នាំជាប្រចាំ នាងក៏បានសួរនាំតែប្តីបានឆ្លើយប្រាប់ថាកើតជំងឺថ្លើម។ លុះមកដល់ឆ្នាំ ២០២១ បុរសជាប្តីក៏បានជាប់ពន្ធធនាគារពីបទបើកបនល្បែង ហើយនាងក៏បានទៅសួរសុខទុក្ខប្តីនៅទីនោះ ស្រាប់តែអាជ្ញាធរប្រចាំគុកប្រាប់នាងថាឱ្យនាងត្រៀមថ្នាំជំងឺអេដស៍មកផង មកដល់ពេលនេះទើបនាងដឹងថាប្តីកើតជំងឺអេដស៍។
យ៉ាងណាមិញ បុរសជាប្តីក៏បានសារភាពថា ខ្លួនបានផ្ទុកជំងឺអេដស៍តាំងពីឆ្នាំ ២០១១ ពោលគឺតាំងតែពេលទើបទាក់ទងគ្នាជាមួយប្រពន្ធឯណោះ។ ស្រ្តីជាប្រពន្ធពិតជាភ្ញាក់ផ្អើល និងភ័យខ្លាចជាខ្លាំង រួចក៏ទៅពិនិត្យសុខភាពមើល តែសំណាងល្អនាងមិនបានឆ្លងជំងឺអេដស៍ពីប្តីឡើយ តែនាងត្រូវរស់នៅក្នុងភាពភ័យខ្លាច និងតប់ប្រមល់ជាខ្លាំង។ ក្រោយមកទៀត ស្រ្តីជាប្រពន្ធក៏បានដាក់ពាក្យប្ដឹងលែងលះទៅតុលាការ ហើយតុលាការក៏បានសម្រេចឱ្យទៅតាមផ្លូវច្បាប់៕
