«សុំទោស» ត្រឹមតែជាពាក្យពីរម៉ាត់ ប៉ុន្តែវាអាចធ្វើឱ្យរឿងខ្លះប្រសើរឡើង និង មិនបង្កទៅជាបញ្ហានាំឱ្យស្តាយក្រោយ។ ជាក់ស្តែង តាមការចែករំលែកពី អ្នកឧកញ៉ា គិត ម៉េង នៅលើបណ្តាញសង្គម លោកបានលើកឡើងពីការនិយាយពាក្យ «សុំទោស» ៧ យ៉ាង ដែលនឹងអាចជៀសផុតពីការសោកស្តាយទាំង ៧ នៅក្នុងជីវិតប្រចាំថ្ងៃ។
តាមរយៈទំព័រហ្វេសប៊ុករបស់អ្នកឧកញ៉ា លោកបានសរសេររៀបរាប់ដូច្នេះថា៖ «និយាយថា “សុំទោស” មុនពេលរឿងខ្លះកើតទ្បើងនាំឱ្យស្តាយក្រោយ ! អ្នកអាចចៀសផុតពីការសោកស្តាយទាំង ៧ ក្នុងជីវិតរស់នៅប្រចាំថ្ងៃ។
ជារឿយៗ យើងបដិសេធមិនសុំទោសដោយគិតថា “មនុស្សដែលយើងធ្វើខុសចំពោះគេមិនប្រកាន់ទោសពៃរ៍” ឬ “កំហុសនោះមិនមែនជារឿងធំនោះទេ” ប៉ុន្តែពេលខ្លះ អ្នកមិនមានឱកាសច្រើនដើម្បីនិយាយពាក្យសុំទោសនៅពេលក្រោយនោះទេ។ ខាងក្រោមនេះគឺជាស្ថានភាពចំនួន ៧ នៅក្នុងជីវិតប្រចាំថ្ងៃ ដែលការនិយាយពាក្យសុំទោសប្រហែលជាអាចបញ្ចៀសយើងពីការសោកស្តាយ មុនពេលអស់ឱកាស។
១. “សុំទោស” មុនពេលមនុស្សជាទីស្រលាញ់របស់អ្នកឈប់ទទួលការហៅទូរស័ព្ទរបស់អ្នក។
២. “សុំទោស” មុនពេលដៃគូរបស់អ្នកឈប់ត្អូញត្អែរ ពីព្រោះភាពស្ងៀមស្ងាត់មិនមែនមានន័យថាបញ្ហាត្រូវបានដោះស្រាយនោះទេ។ វាជាការដកខ្លួនចេញ ឬជាការចាកចេញ។
៣. “សុំទោស” មុនពេលកំហុសតូចក្លាយជាបញ្ហាធំ។
៤. “សុំទោស” មុនពេលឪពុកម្តាយរបស់អ្នកឈប់សួរពីជីវិតរបស់អ្នក។
៥. “សុំទោស” មុនពេលចៅហ្វាយរបស់អ្នកសម្រេចចិត្តដាក់អ្នកថ្មីជំនួសអ្នក ដោយសារភាពខ្វះចន្លោះក្នុងការងាររបស់អ្នក។
៦. “សុំទោស” មុននឹងមនុស្សដែលអ្នកធ្វើឱ្យឈឺចាប់ ចាកចេញពីអ្នក ហើយស្វែងរក និង ទទួលបានភាពរីករាយជាមួយអ្នកដទៃ។ រឿងដែលធ្វើឱ្យអ្នកកាន់តែឈឺចាប់បំផុត គឺនៅពេលដែលអ្នកឃើញមនុស្សដែលអ្នកស្រលាញ់ មានភាពកាន់តែរីករាយ ដោយគ្មានវត្តមានរបស់អ្នកនៅជាមួយ។
៧. “សុំទោស” មុនពេលអ្នកគិតទៅដល់អនាគត ហើយទើបដឹងថាបញ្ហាគឺមកពីអ្នក។ អ្នកបានស្តីបន្ទោសអ្នកដទៃ ដូចជាអតីតគូស្នេហ៍របស់អ្នក មិត្តភ័ក្តិអ្នក ការងាររបស់អ្នក ថាបានបង្កឱ្យមានបញ្ហាខុសពីអ្វីដែលអ្នកចង់បាន។ ប៉ុន្តែ ក្នុងចិត្តរបស់អ្នក អ្នកបានដឹងការពិតថាបញ្ហាគឺមកពីអ្នក។ ការសុំទោសដែលពិបាកបំផុតគឺសុំទោសចំពោះខ្លួនអ្នក ដោយអ្នកមិនបានធ្វើឱ្យបានល្អគ្រប់គ្រាន់។
និយាយពាក្យ “សុំទោស” មិនមែនជាភាពទន់ខ្សោយទេ តែជាការបង្ហាញប្រាជ្ញារបស់អ្នក។ សូមនិយាយពាក្យនេះមុននឹងទង្វើរបស់អ្នកធ្វើឱ្យមានការឈឺចាប់ ឬការខូចខាតជារៀងរហូត ពីព្រោះកំហុសមួយចំនួនមិនអាចលុបចោលបាន មានតែការសោកស្តាយប៉ុណ្ណោះ។ សូមនិយាយថា “សុំទោស” មុនពេលរឿងទាំងនេះកើតឡើង៕
ប្រភព៖ Neak Oknha Kith Meng
