ធៀបការស្អាតប្លែកពីគេ! ជី ដេវីត និង ទេព បូព្រឹក្ស រៀបចំធៀបការអញ្ជើញភ្ញៀវ រំលេចរចនាបថបែបប្រាសាទអង្គរស្អាតប្រណីតទាក់ភ្នែកណាស់

នៅសល់តែ ១ ខែទៀតទេ តារាចម្រៀងប្រុសស្រី លោក ជី ដេវីត និង អ្នកនាង ទេព បូព្រឹក្ស បានក្លាយជាកូនកំលោះកូនក្រមុំក្នុងរោងជ័យតាមប្រពៃណីហើយ ដោយអ្នកទាំងពីរបានត្រៀមរៀបចំថ្ងៃពិសេសយ៉ាងធំដុំអធិកអធមនៅថ្ងៃទី ៧ ខែមិថុនា ឆ្នាំ ២០២៥ ខាងមុខ។

ស្របពេលកំពុងត្រៀមខ្លួនសម្រាប់ថ្ងៃសិរីមង្គលខាងមុខនេះ ងាកទៅមើលអនាគតកូនកំលោះកូនក្រមុំក្នុងរោងជ័យទាំងពីររូប បានដឹកដៃគ្នាថតរូប Pre-Wedding ក្នុងឈុតសម្លៀកបំពាក់ប្រពៃណីខ្មែរដ៏ស្អាតៗប្រណីតគ្រប់ទម្រង់ជាបន្តបន្ទាប់ ទាំងក្នុង និង ក្រៅប្រទេស ជាពិសេស គ្រងឈុតបុរាណថតរូបបែប Concept ជំនាន់មុន ធ្វើឱ្យមហាជនផ្ទុះចាប់អារម្មណ៍សរសើរ និង អស់សំណើចផងដែរ។

ដោយឡែក ក្រោយពីបង្ហាញរូបភាព Pre-Wedding ស្អាតប្លែកៗ ពេលនេះដែរ ក៏បានឃើញលោក ជី ដេវីត និង អ្នកនាង ទេព បូព្រឹក្ស បានរៀបចំធៀបការសម្រាប់អញ្ជើញភ្ញៀវកិត្តិយសចូលរួមថ្ងៃមង្គលរបស់អ្នកទាំងពីរហើយ។ ចំពោះធៀបការនេះដែរ ក៏កំពុងផ្ទុះចាប់អារម្មណ៍ចែករំលែកសរសើរចំពោះម៉ូដរបស់ធៀបការ ដែលរំលេចរចនាបថបែបប្រាសាទអង្គរវត្តយ៉ាងស្រស់ស្អាតប្រណីតប្លែកភ្នែកខ្លាំង៕