ប្រិយមិត្តអ្នកនិយមតាមដានមាតិការបស់អ្នកស្រី Shina Khmer ច្បាស់ជាបានស្គាល់ក្រុមគ្រួសារ សុខជា ច្បាស់ហើយ ដែលម្ដាយរបស់ សុខជា តែងនិយមធ្វើវីដេអូចម្អិនម្ហូបខ្មែរផ្សេងៗ នៅឯប្រទេសឥណ្ឌា ព្រមទាំងបង្ហាញពីរបៀបរបបរស់នៅ និង ជំនឿសាសនាមួយចំនួនក្នុងតំបន់ដែលគ្រួសារសុខជាបានរស់នៅ ចែករំលែកដល់អ្នកប្រើប្រាស់បណ្ដាញសង្គមនៅកម្ពុជាបានឃើញ។
អ្វីដែលគួរឱ្យចាប់អារម្មណ៍នោះ សឹងតែគ្រប់វីដេអូ ម្ដាយសុខជា តែងតែបញ្ជាក់ពីអារម្មណ៍របស់ សុខជា ដែលចង់មកកម្ពុជាមកលេងស្រុកកំណើតរបស់ខ្លួន ព្រោះថាពេលម្ដាយមកលើកមុនពុំបាននាំគេមកជាមួយ ខណៈការធ្វើដំណើរទៅមករពីឥណ្ឌាមកកម្ពុជា មានតម្លៃថ្លៃគួរសមក្នុងការចំណាយ។
យ៉ាងណាមិញ ទីបំផុត ក្ដីប្រាថ្នារបស់ក្មេងប្រុស សុខជា បានសម្រេចប្រកបដោយក្ដីរីករាយ ខណៈថ្មីៗនេះ រូបគេបានមកដល់ទឹកដីកំណើតជាមួយម្ដាយ និង លោកយាយរបស់គេហើយ។ ក្នុងនោះតាមរយៈវីដេអូនៅថ្ងៃទី ២១ ខែតុលា ឆ្នាំ ២០២៥ នេះ ម្ដាយ សុខជា បានបង្ហាញពីទិដ្ឋភាព អ្នកភូមិផងរបងជាមួយ សុខជា បាននាំគ្នាទិញនំចំណីមកលេង សុខជាដល់ផ្ទះ ប្រកបដោយអារម្មណ៍កក់ក្ដៅ និង ស្និទ្ធស្នាល ក្រោយក្មេងប្រុសរូបនេះ បានមកដល់ទឹកដីកំណើតរបស់ខ្លួន៕
