នៅរសៀលថ្ងៃទី ១៥ ខែកក្កដា ឆ្នាំ ២០២៥ នេះ មានករណី ក្រុមទាហានថៃ បានរារាំងភ្ញៀវទេសចរកម្ពុជា មិនឱ្យឡើងទៅទស្សនាប្រាសាទតាមាន់ធំ ដែលស្ថិតក្នុងដែនអធិបតេយ្យរបស់កម្ពុជា រហូតនាំឱ្យមានការ រុញច្រានគ្នាមួយប្រាវ ប៉ះទង្គិចគ្នាដោយសម្ដី ខណៈមិនមានការផ្ទុះអាវុធនោះទេ។
ទាក់ទិនទៅនឹងករណីនេះផងដែរ តាមសេចក្ដីរាយការណ៍ពីប្រាសាទតាមាន់ធំ តាមរយៈសារព័ត៌មានក្នុងស្រុកបានឱ្យដឹងថា ការប៉ះទង្កិចគ្នានេះ គឺផ្ដើមចេញពីក្រុមទាហានប៉ារ៉ាថៃ បានរារាំងភ្ញៀវទេសចរកម្ពុជា ដែលចង់ឡើងទៅទស្សនានៅប្រាសាទតាមាន់ធំ ដែលបានធ្វើឱ្យប៉ះទង្គិចគ្នាដោយសម្ដីរវាងស្ដ្រីភ្ញៀវទេសចរកម្ពុជា ជាមួយក្រុមយោធាថៃ ហើយក៏មានការអន្ដរាគមន៍ពីសំណាក់ក្រុមទាហានកម្ពុជា ដែលឈរជើងការពារដែនអធិតេយ្យជាតិ នៅប្រាសាទនោះផងដែរ ដើម្បីបន្ធូរស្ថានការណ៍។
តាមប្រភពបានឱ្យដឹងទៀតថា បច្ចុប្បន្ននេះ ស្ថានភាពនៅប្រាសាទតាមាន់ធំនៅពេលនេះ បានស្ងប់ស្ងាត់ទៅវិញហើយ តាមរយៈការជួយសម្របសម្រួលគ្នាពីសំណាក់ លោកឧត្តមសេនីយ៍ត្រី នាក់ វង្ស មេបញ្ជាការកងពលតូចថ្នើរជើងលេខ ៤២ ជាមួយនឹងថ្នាក់ដឹកនាំយោធាថៃឈរជើងនៅទីនោះ៕
ប្រភព ៖ Fresh News
