កន្លងមកកើតឡើងច្រើនករណីហើយ ដែលទង្វើរបស់បុរសពិតបានធ្វើឱ្យបុរសមិនពិត ឬ បុរសស្រលាញ់ភេទដូចគ្នាយល់ច្រឡំជាស្នេហា ជាពិសេសវាច្រើនកើតឡើងទៅលើមិត្តភក្តិតែម្តង។ ដូចនេះ ដើម្បីរក្សាទំនាក់ទំនង ក៏ដូចជាជៀសវាងការយល់ច្រឡំ បុរសពិតគួរកុំហួសព្រំដែននូវទង្វើ ៥ យ៉ាងដូចខាងក្រោម។
១. បង្ហាញទង្វើស្រលាញ់ ឬ ប៉ះពាល់រាងកាយ
ធម្មជាតិរបស់បុរសពិតខ្លះ ចូលចិត្តបង្ហាញការស្រលាញ់ ផ្តល់នូវការឱប ប៉ះពាល់រាងកាយ ឬ កៀកកិតប្រាណ។ ខណៈបុរសពិតគិតថាសកម្មភាពនេះធម្មតា តែវានឹងបង្កើតការយល់ច្រឡំជាទង្វើស្នេហា ឬ អារម្មណ៍រ៉ូមែនទិកដល់បុរសស្រលាញ់ភេទដូចគ្នា។
២. ចែករំលែកអារម្មណ៍ជ្រាលជ្រៅ
បុរសពិតដែលចូលចិត្តបើកចិត្តប្រាប់ពី អារម្មណ៍ពេញចិត្ត អារម្មណ៍រំភើប ភាពភ័យខ្លាច ក្តីសុបិន ឬ ការពុះពាររបស់ខ្លួន វាអាចបង្កើតឱ្យមិត្តមានអារម្មណ៍ភ្ជាប់គ្នាស៊ីជម្រៅ។ អាចថាភាពស្និទ្ធស្នាលដឹងចិត្តថ្លើមគ្នា នឹងបណ្តុះក្តីស្រលាញ់ ធ្វើឱ្យមិត្តជាបុរសស្រលាញ់ភេទដូចគ្នា បាក់ចិត្តដោយមិនដឹងខ្លួន។
៣. ប្រើសម្តីលែបខាយដើម្បីលេងសើច
បុរសពិតខ្លះចូលចិត្តនិយាយពាក្យលែបខាយ ដោយគិតថាជាការលេងសើច តែផ្ទុយមកវិញ វាអាចធ្វើឱ្យមិត្តបាក់ចិត្តស្រលាញ់ និង មានអារម្មណ៍ជ្រាលជ្រៅរហូតដកចិត្តមិនរួច។
៤. ចំណាយពេលតែពីរនាក់ច្រើនជ្រុល
ចំណាយពេលច្រើនតែពីរនាក់ មិនថាចេញទៅក្រៅ ដើរកម្សាន្ត ឬ សកម្មភាពសប្បាយ វាអាចបង្កើតជាអារម្មណ៍ស្និទ្ធស្នាល ហើយមានអារម្មណ៍ស្នេហា។ បើអាចបុរសពិតគួរកំណត់ព្រំដែនដើរតែពីរនាក់ ឬ បើអាចទៅជាក្រុមទើបជាការប្រសើរ។
៥. ធ្វើជាប្រចណ្ឌ
បុរសពិតមួយចំនួនចូលចិត្តសម្តែងលេងធ្វើជាប្រចណ្ឌ ដែលនេះពិតជាធ្វើឱ្យមិត្តភក្តិ ដែលស្រលាញ់បុរសដូចគ្នាកាន់តែយល់ច្រឡំ។ បុរសពិតអាចគិតថាលេង តែយូរៗទៅវានឹងធ្វើឱ្យមិត្តគិតថាពិតមែន រហូតជ្រុលចិត្តស្រលាញ់ជាស្នេហា៕
