គ្រប់គ្នាអាចនឹងគិតថា ចែហុង សំណាង ដែលបានភ្លក់រសជាតិប្រុសក្មេងជាច្រើន ប៉ុន្តែទោះសំណាងយ៉ាងណា ក៏នៅចាញ់ចែស៊ីន (Sister Xin) ជនជាតិចិន អាយុ ៥០ ឆ្នាំនេះដែរ ព្រោះចែបានប្រុសក្មេងជនជាតិរុស្សី ចាប់ចិត្ត សុំស្រលាញ់ច្បាស់លាស់ ទាក់ទងគ្នារហូតមានផ្ទៃពោះ។
ជាការពិត ចែស៊ីន ជាស្ត្រីជនជាតិចិន ជាម្ចាស់ក្រុមហ៊ុនបណ្តាញតិចណូឡូជីឈ្មោះថា Guangzhou Douy។ បច្ចុប្បន្ន នាងមានភាពល្បីល្បាញនៅលើបណ្តាញសង្គម ដែលមិនត្រឹមតែរៀបការជាមួយមិត្តរួមថ្នាក់របស់កូនប្រុសប៉ុណ្ណោះទេ តែថែមទាំងកំពុងពពោះកូនជាមួយគ្នាផងដែរ។
យោងតាមសារព័ត៌មានចិនចុះផ្សាយជាច្រើន ចែស៊ីន ជាស្ត្រីដ៏រឹងមាំបានចិញ្ចឹមកូនដោយខ្លួនឯង ដោយមានកូនប្រុសម្នាក់ និង កូនស្រីម្នាក់ ក្រោយពេលលែងលះស្វាមីនៅអាយុ ៣០ ឆ្នាំ។
ជីវិតស្នេហារបស់ចែស៊ីនបានចាប់ផ្តើមពន្លកថ្មី នៅពេលដែលកូនប្រុសរបស់គាត់ឈ្មោះ Kaikai បានហៅមិត្តរួមថ្នាក់ជនជាតិបរទេស ៣ នាក់មកលេងផ្ទះនៅអំឡុងបុណ្យចូលឆ្នាំចិនកាលពី ៦ ឆ្នាំមុន។
ចំណោមមិត្តរួមថ្នាក់ទាំង ៣ ក្នុងនោះមានបុរសម្នាក់ជនជាតិរុស្សីឈ្មោះ Defu អាចនិយាយភាសាចិនយ៉ាងស្ទាត់ បន្ទាប់ពីលោកបានរស់នៅប្រទេសចិនប្រមាណ ៣ ឆ្នាំ។ គ្រានោះ ដោយ Defu ចាប់អារម្មណ៍ខ្លាំងទៅលើការធ្វើម្ហូប និង ការតុបតែងផ្ទះរបស់ចែស៊ីន លោកក៏បានសុំអនុញ្ញាតចែស៊ីន ស្នាក់នៅផ្ទះមិនត្រឹមតែមួយថ្ងៃ តែពេញមួយអាទិត្យតែម្តង។
ដំបូងឡើយ ចែស៊ីន មិនគិតថាទំនាក់ទំនងជាមួយប្រុសក្មេងអាចទៅរួចឡើយ ដោយហេតុ អ្នកទាំងពីរមានអាយុគម្លាតគ្នាជាង ២០ ឆ្នាំ ម្យ៉ាង Defu ជាបុរសវ័យក្មេងសង្ហា កម្ពស់ដល់ទៅ ១,៩៥ ម៉ែត្រឯណោះ ហើយវប្បធម៌ក៏ខុសគ្នាទៀត។
យ៉ាងណាមិញ ដោយមានការជំរុញពីកូនប្រុស ចែស៊ីន ក៏សម្រេចចិត្តចាប់ផ្តើមមានស្នេហាឡើយវិញជាលើកទី ២។ ទីបំផុត នៅដើម ឆ្នាំ ២០២៥ នេះ ចែស៊ីន និង Defu ដែលជាមិត្តរួមថ្នាក់របស់កូនប្រុស បានចុះសំបុត្រអាពាហ៍ពិពាហ៍ជាមួយគ្នា។
កាលពីខែមិថុនាកន្លងទៅ ចែស៊ីន ក៏បានប្រកាសនៅក្រុមហ៊ុនថា នាងកំពុងមានផ្ទៃពោះជាមួយបុរសក្មេងផងដែរ។ នាងនិយាយថា៖ «ស្ត្រីចំណាស់មានផ្ទៃពោះមកជាមួយហានិភ័យខ្ពស់ ប៉ុន្តែនៅជាមួយ Defu ពិតជាធ្វើឱ្យវាមានតម្លៃបំផុត»។
កូនក្នុងផ្ទៃរបស់អ្នកទាំងពីរអាចនឹងគ្រប់ខែនៅអំឡុងខែមីនាដល់ខែឧសភា ឆ្នាំក្រោយ។ អ្នកទាំងពីរបានត្រៀមខ្លួនរួចរាល់ ដោយបានទិញ គ្រែ សម្ភារ និង សម្លៀកបំពាក់សម្រាប់ស្វាគមន៍កូនរួចរាល់៕
ប្រភព៖ 8days
