តំណែងជា CEO ឬ ខ្មែរយើងហៅថា នាយកប្រតិបត្តិ សំដៅដល់តំណែងខ្ពស់ជាងគេនៅក្នុងក្រុមហ៊ុន។ តំណែងនេះមានការទទួលខុសត្រូវច្រើន រាប់តាំងពីសេចក្តីសម្រេចនានា រហូតដល់យុទ្ធសាស្ត្រដឹកនាំក្រុមហ៊ុន។ តែយ៉ាងណាមិញ CEO ខ្លះត្រូវបានបុគ្គលិកនិយាយដើមមិនចេះចប់ ដោយសារតែអាកប្បកិរិយាមិនសមគួររបស់ពួកគេ។ មើល! តើ CEO ណាមួយដែលអ្នកកំពុងជួប?
១. CEO ស៊ើបអង្កេត
នេះជា CEO ដែលតែងតែតាមដានរាល់ព័ត៌លម្អិតរបស់បុគ្គលិក ច្រើនជាងការជឿជាក់ទៅលើសមត្ថភាពរបស់ពួកគេ។ ទង្វើនេះបង្កើតជាបរិយាកាសមួយបង្ហាញពីការមិនទុកចិត្តឬបង្អាក់ទឹកចិត្តក្រុមការងារ។ ក្រុមការងារនឹងនិយាយដើម CEO ប្រភេទនេះមិនចេះចប់អំពីកង្វះសេរីភាព និង ការខ្វះសមត្ថភាពរបស់ CEO ក្នុងការប្រគល់ការងារឱ្យទៅនរណាម្នាក់។
២. CEO បក្សពួកនិយម
ការបង្ហាញចំណូលចិត្ត ឬស្រលាញ់តែបុគ្គលិកណាម្នាក់ ដោយផ្តល់ភាពមិនស្មើគ្នាដូចជា ការដំឡើងប្រាក់ខែ ការមកធ្វើការយឺត ឬផ្តល់អត្ថប្រយោជន៍ច្រើនជាង វាអាចបង្កើតជាការបែងចែកបក្សពួកនៅក្នុងក្រុមការងារ។ ក្រុមការងារនឹងនិយាយដើម CEO នេះអំពីការប្រព្រឹត្តដោយអយុត្តធម៌ និង ស្មានហេតុផលនៅពីក្រោយរឿងកើតឡើង។
៣. CEO គ្មានវិជ្ជាជីវៈ
អាចជាអាកប្បកិរិយាលេងសើចមិនសមរម្យ មានទំនាក់ទំនងជាមួយបុគ្គលិក ឬចូលចិត្តប្រើកំហឹងនៅពេលធ្វើការ។ បុគ្គលិកនឹងនិយាមដើម CEO នេះពីកង្វះភាពវិជ្ជាជីវៈ និង ព្យាករពីលទ្ធផលអវិជ្ជមានរបស់ក្រុមហ៊ុន។
៤. CEO តែងគិតខ្លួនឯងត្រូវ
ការមិនស្តាប់មតិយោបល់ ឬគំនិតរបស់បុគ្គលិកនឹងបង្កើតជាបរិយាកាសការងារមួយ ដែលធ្វើឱ្យបុគ្គលិកមានអារម្មណ៍ថា សំឡេងរបស់ពួកគេគឺគ្មានន័យ។ ជាមួយការខកចិត្ត បុគ្គលិកនឹងនិយាយដើមអំពីការខ្វះទំនុកចិត្តរបស់ CEO ចំពោះទស្សនៈរបស់ពួកគេ។
៥. CEO កេងប្រវ័ញ្ច
អាចជាការប្រើប្រាស់ធនធាន ពេលវេលា ឬទ្រព្យសម្បត្តិរបស់ក្រុមហ៊ុនសម្រាប់ធ្វើរឿងផ្ទាល់ខ្លួន។ ប្រើលុយក្រុមហ៊ុនលើការចំណាយផ្ទាល់ខ្លួនផ្សេងៗ ឬ កិបកេងយកចំណេញជាដើម។ ទង្វើនេះនឹងបង្កើតជារូបភាពគ្មានទំនួលខុសត្រូវ និង គ្មានសីលធម៌៕
