ជាការពិតណាស់ បើនិយាយពីអតីតបេក្ខភាពកម្មវិធី The Voice Kids Cambodia រដូវកាលទី ១ ប្រិយមិត្តច្បាស់ជានៅចាំ ចាន់ ស្រីខួច នៅឡើយ ដោយបច្ចុប្បន្ន នាងបានចម្រើនវ័យពេញរូបពេញរាងយ៉ាងស្រស់ស្អាត។ លើសពីនោះ កញ្ញា ចាន់ ស្រីខួច បច្ចុប្បន្នក៏មានទីផ្សារការងារសិល្បៈជាច្រើន មិនថាតែការថតស្បតផ្សព្វផ្សាយនានាប៉ុណ្ណោះទេ តែនាងក៏ជាតារាចម្រៀងអាជីពមួយរូបផងដែរ។
អ្វីដែលកាន់តែចាប់អារម្មណ៍ទៀតនោះ ថ្មីៗនេះ ស្រីស្អាតតូចច្រឡឹង កញ្ញា ចាន់ ស្រីខួច ក៏បានក្លាយទៅជាតារាចម្រៀងរួមទ្រនំនឹងក្រុមចម្រៀងរ៉េបល្បី La Cima Cartel គឺផលិតកម្ម Pluss 855 Music។ ក្នុងនោះ កញ្ញា ចាន់ ស្រីខួច ក៏ទើបតែចេញចម្រៀងរួមគ្នានឹងតារាចម្រៀងរ៉េបលោក Meezy24K គឺបទ «បណ្ដូលចិត្ត» ឆក់បានការគាំទ្រយ៉ាងខ្លាំង។
ដោយឡែក ថ្មីៗនេះ កញ្ញា ចាន់ ស្រីខួច បានធ្វើឱ្យអ្នកគាំទ្រនាងមានការចាប់អារម្មណ៍ ខណៈស្រីស្អាតរូបនេះ បានបង្ហោះរូបភាព ២ សន្លឹក ជាមួយនឹងតារាចម្រៀងរួមទ្រនំ គឺសមាជិក La Cima Cartel ចំនួន ៤ រូប ដោយអមនឹងរូបភាព ២ សន្លឹកផ្សេងទៀតរបស់តួអង្គរឿង F4 តៃវ៉ាន់។
ក្នុងនោះដែរ ក្រោយឃើញរូបភាពនោះ អ្នកគាំទ្រលើកឡើងថា កញ្ញា ចាន់ ស្រីខួច ចេះរកនឹកឃើញ ព្រោះរូបភាពទាំងនោះ ទន្ទឹមគ្នាមើលទៅដូចក្នុងរឿង F4 ពិតមែន ដោយមានកញ្ញា ចាន់ ស្រីខួច ជាតួអង្គ សាន់ឆាយ និង សមាជិក La Cima Cartel ៤ រូបទៀតរួមមានលោក Hahsa, លោក Meezy24K, លោក YCN Rakhie និង លោក YCN Tomie ដូចក្រុម F4៕
