ខ្លាំងមួយចប់ចឹងតើ ទើប ហ៊ាប ស៊ាងហ៊ុយ ដណ្ដើមបានតំណែងបុរសឯកម្ដងទៀត មិនឱ្យអ្នកគាំទ្រខកចិត្ត

មហាជនអ្នកគាំទ្រតាមដានវិស័យបវរកញ្ញា និង បុរសឯក សុទ្ធសឹងតែបានស្គាល់ហើយពីលោក ហ៊ាប ស៊ាងហ៊ុយ បេក្ខភាពបុរសឯក Mister Supranational Cambodia 2025 ដែលលោកធ្លាប់ជាប្រុសស្អាតដំបូងប្រកួតដណ្ដើមបានជ័យលាភីបុរសឯកក្នុងកម្មវិធី Mister Friendship Cambodia ឆ្នាំ ២០២២ កន្លងទៅ។

ម្ចាស់តំណែងបុរសឯក Mister Friendship Cambodia 2022 រូបនេះ ក៏ធ្លាប់បានបំពេញបេសកកម្មតំណាងកម្ពុជាចូលរួមប្រកួតលើឆាកអន្តរជាតិកម្មវិធី Mister Friendship International 2022 នៅប្រទេសថៃ ធ្វើបានយ៉ាងល្អទីមោទកភាពសម្រាប់វិស័យបុរសឯកកម្ពុជាផងដែរ។

ដោយឡែក ចំពោះការវិលត្រឡប់ជាថ្មីរបស់បុរសឯក ហ៊ាប ស៊ាងហុយ ក្នុងការប្រកួតដណ្ដើមជ័យលាភីបុរសឯកម្ដងទៀតក្នុងឆ្នាំ 2025 នេះ ត្រូវបានមហាជនអ្នកគាំទ្រចាប់អារម្មណ៍តាមដាន និង បង្ហាញការគាំទ្រខ្លាំង ព្រោះមើលឃើញពីសមត្ថភាពដ៏លេចធ្លោរបស់លោក។

យ៉ាងណាមិញ ​មកដល់រាត្រីថ្ងៃទី ២ ខែមេសា ឆ្នាំ ២០២៥ នេះ ជាវគ្គផ្ដាច់ព្រ័ត្រនៃកម្មវិធី Miss & Mister Supranational Cambodia 2025 អ្វីដែលធ្វើឱ្យមហាជនអ្នកគាំទ្រកាន់តែបង្ហាញក្ដីរំភើបអបអរចំពោះបេក្ខភាពបុរសឯករូបនេះ ក្រោយពីកម្មវិធីបានប្រកាសរកឃើញម្ចាស់ជ័យលាភីបុរសឯកថ្មីប្រចាំឆ្នាំ ២០២៥​ នេះហើយ គឺបានទៅលើបុរសឯក ហ៊ាប ស៊ាងហ៊ុយ។

ចំពោះតំណែងជាម្ចាស់ជ័យលាភី Mister Supranational Cambodia 2025 នេះ លោក ហ៊ាប ស៊ាងហុយ កំពុងត្រូវបានមហាជនអ្នកគាំទ្រវិស័យបុរសឯកជាច្រើនចែករំលែកបង្ហាញការគាំទ្រពេញចិត្តខ្លាំង ព្រោះលោកមានទាំងសមត្ថភាព និង ចំណេះដឹង ស័ក្តិសមបំផុតដើម្បីតំណាងឱ្យកម្ពុជាឈរលើឆាកអន្តរជាតិផងដែរ៕