ក្រៅពីបង្ហោះចែករំលែកតតាំងនឹងការឈ្លានពាន និង បង្ហាញការបួងសួងជួយថែរក្សាបងប្អូនកងទ័ពខ្មែរជួរមុខតាមព្រំដែនឱ្យមានសុខសុវត្ថិភាព មហាជនខ្មែរទូទាំងប្រទេស ក៏កំពុងចូលរួមជួយជាថវិកា និង គ្រឿងសម្ភារៈផ្សេងៗ សម្រាប់ជូនកងទ័ព និង បងប្អូនដែលភៀសសឹកផងដែរ។
ក្នុងនោះ តាមរយៈការផ្ដើមរៃអង្គាសថវិកាពីសប្បុសជនខ្មែរលើហ្វេសប៊ុករបស់បុគ្គលល្បីៗជាច្រើន បើងាកមើលលើហ្វេសប៊ុករបស់លោក Peypey Dy អ្នកផលិតមាតិកាវីដេអូ និង ជាអ្នកជំនួញល្បីឈ្មោះ បានដាក់ការរៃអង្គាសមកដល់ពេលនេះ ត្រឹមតែកន្លះថ្ងៃ លោកទទួលបានថវិកាពីសប្បុរសជន អ្នកសិល្បៈ ក៏ដូចជាបងប្អូនមហាជនខ្មែរជាច្រើន ចំនួនប្រមាណជាង ៣០ ម៉ឺនដុល្លារហើយ។
ចំពោះថវិកានេះដែរ លោក Peypey Dy កំពុងរៀបចំស្បៀងអាហារ និង គ្រឿងសម្ភារៈផ្សេងៗ ត្រៀមធ្វើដំណើរទៅតាមព្រំដែនជួយដល់បងប្អូនកងទ័ព និង តំបន់ដែលបងប្អូនគ្រួសារភៀសខ្លួននៅកន្លែងសុវត្ថិភាពផងដែរ៕
