នៅរសៀលថ្ងៃទី ១១ ខែកក្កដា ឆ្នាំ ២០២៥ នេះ សាលាដំបូងរាជធានីភ្នំពេញ បានបើកសវនាការដើម្បីប្រកាសសាលក្រម លើអតីតស្ត្រីមេតុងទីនតាមអនឡាញឈ្មោះ អឿន ម៉ូលីកា ករណីចេញសែកស្អុយ ក្រោមសមាសសភាពលោកស្រី ហុង ម៉ារីនិច ជាចៅក្រម និង លោក ស៊ិន រក្សា ជាតំណាងអយ្យការ ដោយបានសម្រេចដាក់ទោសជនជាប់ចោទឈ្មោះ អឿន ម៉ូលីកា ចំនួន ១៥ ខែ ក្រោមបទចោទប្រកាន់ «ករណីមិនបំពេញកាតព្វកិច្ចចំពោះឧបករណ៍ដែលអាចជួញដូរបាន (ចេញសែកស្អុយ)»។
តាមប្រភពព័ត៌មានបានឱ្យដឹងថា ជនត្រូវចោទឈ្មោះ អឿន ម៉ូលីកា ត្រូវបានចៅក្រមស៊ើបសួរកាលពីថ្ងៃទី ១៨ ខែធ្នូ ឆ្នាំ២០២២ បានសម្រេចចេញដីកាឃុំខ្លួនដាក់ពន្ធនាគារជាបណ្តោះអាសន្ន ក្រោមការចោទប្រកាន់ពីបទ រំលោភលើទំនុកចិត្ត «មិនបំពេញកាតព្វកិច្ចចំពោះឧបករណ៍អាចជួញដូរបាន» ករណីចេញមូលប្បទានបត្រអត់សាច់ប្រាក់ (សែកស្អុយ) ប្រមាណ ៣៦៥,០០០ ដុល្លារ។ ក្រោយពីសួរចប់តំណាងអយ្យការ បានធ្វើការសម្រេចចោទប្រកាន់ជនត្រូវចោទជាផ្លូវការ រួចបានបញ្ជូនទៅខាងចៅក្រមស៊ើបសួរតាមនីតិវិធី។
ក្នុងនោះ ជនត្រូវចោទឈ្មោះ អឿន ម៉ូលីកា ក៏មានជាប់ពាក់ពន្ធលើពាក្យបណ្តឹង ២ ដែលជាបទល្មើសព្រហ្មទណ្ឌ រឿងចេញសែកស្អុយដែលមានទឹកប្រាក់ប្រមាណ ៣៦៥,០០០ដុល្លារ រួមមាន៖
ពាក្យបណ្តឹងទី ១៖ អឿន ម៉ូលីកា ចេញមូលប្បទានប័ត្រអត់សាច់ប្រាក់ ចំនួន ៣០ ម៉ឺនដុល្លារ ឱ្យទៅឈ្មោះ សម្ផស្ស សូលីដា អ្នកលេងតុងទីនជាមួយគ្នា និង ពាក្យបណ្តឹង។
ពាក្យបណ្តឹងទី ២៖ អឿន ម៉ូលីកា បានចេញមូលប្បទានបត្រ អត់សាច់ប្រាក់ឱ្យទៅឈ្មោះ ទី ចាន់នូ ចំនួន ៦៥,០០០ ដុល្លារ ក៏ជាអ្នកលេងតុងទីនដែរ ដើម្បីយកទៅទិញរថយន្ត ដោយជនត្រូវចោទបានអះអាងថា ខ្ចីមិនដល់មួយខែទេ និង ប្រគល់ប្រាក់សងវិញគ្រប់ចំនួន ប៉ុន្តែទីបំផុតចេញសែកស្អុយមួយសន្លឹក។ ក្រោយមកទើបបុគ្គល អឿន ម៉ូលីកា ត្រូវបានបញ្ជូនទៅឃុំខ្លួននៅពន្ធនាគារព្រៃស ជាបណ្តោះអាសន្ន ដើម្បីរង់ចាំពេលវេលាជំនុំជម្រះទោសទណ្ឌតាមនីតិវិធី៕
ប្រភព ៖ Fresh News
