មិននឹកស្មាន! ឡានអគ្គិសនី Porsche Taycan ថ្មី អាចសាកភ្លើងលឿនដល់ម្លឹង
ក្រុមហ៊ុនគ្រប់គ្រងបណ្តាញសាកភ្លើងរថយន្តអគ្គិសនី Electrify America ទើបតែបានបង្ហាញពីល្បឿនសាកភ្លើងរបស់រថយន្តអគ្គិសនីថ្មីសន្លាង ដែលក្រុមហ៊ុន Porsche ទើបតែបញ្ចេញ គឺ Porsche Taycan ។
Electrify America បានយករថយន្ត Porsche Taycan ដែលប្រើប្រាស់អាគុយកម្លាំង ៩៣ គីឡូវ៉ាត់ម៉ោង ទៅសាកភ្លើងនៅស្ថានីយរបស់ខ្លួន ដែលមានកម្លាំងសាក ២៧០ គីឡូវ៉ាត់ ពីថាមពលភ្លើង ៥% ទៅដល់ ៨០% ដោយប្រើពេលត្រឹមតែ ២២ នាទីប៉ុណ្ណោះ ។
យ៉ាងណាមិញ ក្រុមហ៊ុន Porsche បានអះអាងថា ស្ថានីយនោះអាចប្រើដើម្បីសាកដល់ទៅកម្លាំង ៣៥០ គីឡូវ៉ាត់ម៉ោងឯណោះ ប៉ុន្តែអះអាងថា បច្ចុប្បន្នមិនទាន់មានអាគុយរថយន្តណាអាចគាំទ្រថាមពលនោះឡើយ ។
គួររំឭកឱ្យដឹងថា កាលពីពេលថ្មីៗនេះ Porsche បានបញ្ចេញរថយន្ត Taycan ចំនួន ៣ ម៉ូដែល គឺ Taycan ធម្មតា , Taycan Turbo និង Taycan Turbo S ដែលមានកម្លាំង ៦១៦ សេះ , ៦៧១ សេះ និង ៧៥០ សេះ ៕
ប្រភព ៖ Carscoops
