foodpanda ចូលរូមរំលែកទុក្ខ និង យកថវិកាចូលបុណ្យសពដៃគូដឹកជញ្ជូនរបស់ខ្លួនដែលបានទទួលមរណភាព
ក្រុមហ៊ុន foodpanda បានចូលរូមការរំលែកទុក្ខដ៏ក្រៀមក្រំទៅកាន់ក្រុមគ្រួសារលោក ឡោម សំណាង អាយុ ២៥ ឆ្នាំ ដែលជាដៃគូដឹកជញ្ជូនរបស់ខ្លួន បានទទួលមរណភាពនៅថ្ងៃសុក្រ ទី ២ ខែធ្នូ ឆ្នាំ ២០២២ វេលាម៉ោងប្រមាណ ១២ ថ្ងៃត្រង់ តាមបណ្ដោយផ្លូវ ២២៥ កែងនឹងផ្លូវ ១១៨ សង្កាត់ផ្សារដេប៉ូ ៣ ខណ្ឌទួលគោក រាជធានីភ្នំពេញ។
ការទទួលមរណភាពរបស់លោក ឡោម សំណាង ពិតជាផ្ដល់ភាពតក់ស្លត់យ៉ាងខ្លាំងសម្រាប់ក្រុមគ្រួសារ និង ក្រុមហ៊ុន foodpanda។
បន្ថែមពីលើនេះដែរ ក្រុមហ៊ុន foodpanda បានឲ្យដឹងកាលពីថ្ងៃទី ០២ ខែធ្នូ ឆ្នាំ ២០២២ នៅថ្ងៃដដែល បានសហការជាមួយក្រុមគ្រួសារសព រៀបចំបុណ្យសពនៅស្រុកកំណើតខេត្តបន្ទាយមានជ័យរបស់សពផ្ទាល់ដែលស្ថិតនៅ ភូមិសំរោងធំ ឃុំឈ្នួរមានជ័យ ស្រុកព្រះនេត្រព្រះ ខេត្តបន្ទាយមានជ័យ។ ទាំងនេះបានបញ្ជាក់បង្ហាញថា ក្រុមហ៊ុន foodpanda មានការយកចិត្តទុកដាក់ ក៏ដូចជាទំនួលខុសត្រូវរបស់ក្រុមហ៊ុនទៅលើដៃគូដឹកជញ្ជូនរបស់ខ្លួន។
ភ្លាមៗនោះផងដែរ តំណាងក្រុមការងារ foodpanda លោក ជួន គីមហាក់ ប្រធានគ្រប់គ្រងដៃគូដឹកជញ្ជូន foodpanda បាននាំយកមូលនិធិ ដែលមានការចូលរួមពីក្រុមហ៊ុនផ្ទាល់ បុគ្គលិក ដៃគូដឹកជញ្ជូន និង សប្បុរសជនជាច្រើនតាមប្រព័ន្ធសង្គម (Facebook) គិតជាទឹកប្រាក់ចំនូន ២២១៦៥.៥៦ ដុល្លារ (ពីរម៉ឺនពីពាន់ មួយរយហុកសិបប្រាំ និង ហាសិបប្រាំមួយដុល្លា) គិតត្រឹម ២០ ម៉ោង ទៅជូនគ្រួសារសពផ្ទាល់ ដែលកំពុងមានទុក្ខធំដោយបាត់បង់ប្ដីជាទីស្រឡាញ់ និង ឪពុកជាសសរទ្រូងរបស់កូនៗ។
ចំណែកថវិកាដែលរៃអង្គាសបានពីសប្បុរសជននានាមួយចំនួនទៀត ក្រុមហ៊ុននឹងយកទៅជូនគ្រួសាសពនៅថ្ងៃប្រារពពិធីបុណ្យ ៧ ថ្ងៃខាងមុខនេះ។ ក្រុមហ៊ុន foodpanda បុគ្គលិក ព្រមទាំង ដៃគូដឹកជញ្ជូនទាំងអស់ សូមឧទ្ទិសបួងសួងដល់វិញ្ញាណក្ខន្ធរបស់លោកបានទៅចាប់បដិសន្ធិក្នុងសុគតិភព កុំបីឃ្លៀងឃ្លាតឡើយ។
