ចាប់ពីឆ្នាំ ២០២៣ តទៅ ការបណ្ដុះបណ្ដាលគរុនិស្សិតកម្រិតឧត្តមនៅ NIE គឺ បរិញ្ញាបត្រ+២ ទាំងអស់
នៅថ្ងៃទី ២៥ ខែឧសភា ឆ្នាំ ២០២៣ ក្រសួងអប់រំ យុវជន និងកីឡា បានធ្វើការកែសម្រួលឡើងវិញបញ្ជីប៉ុស្តិ៍វិទ្យាល័យ សម្រាប់ការប្រឡងជ្រើសរើសគរុនិស្សិតកម្រិតឧត្តមឆ្នាំ ២០២៣ ដោយយកតាមរូបមន្តបរិញ្ញាបត្របូក ២ វិញ។
ជាក់ស្ដែងនៅក្នុងសេចក្ដីប្រកាសក្រសួងអប់រំ បានបញ្ជាក់ថា ដើម្បីលើកកម្ពស់គុណវុឌ្ឍគ្រូបង្រៀនកម្រិតឧត្តម (បង្រៀននៅវិទ្យាល័យ) ក្រសួងអប់រំ យុវជន និង កីឡា បានសម្រេចដាក់ឱ្យអនុវត្តកម្មវិធីបណ្តុះបណ្តាលគរុនិស្សិតកម្រិតឧត្តម នៅវិទ្យាស្ថានជាតិអប់រំ តាមរូបមន្តបរិញ្ញាបត្របូក ២ ទាំងស្រុងចាប់ពីឆ្នាំសិក្សា ២០២៣-២០២៤ តទៅ។
ដោយក្នុងន័យនេះ ក្រសួងបានស្នើសុំ លោក លោកស្រី ប្រធានកែសម្រួលបញ្ជីប៉ុស្តិ៍វិទ្យាល័យសម្រាប់ការប្រឡង ជ្រើសរើសគរុនិស្សិតកម្រិតឧត្តម ឆ្នាំ ២០២៣ ឡើងវិញ និង សូមជូនដំណឹងដល់គ្រប់វិទ្យាល័យពាក់ព័ន្ធអំពីការកែសម្រួលនេះ ដោយប្តូរការបណ្តុះបណ្តាលតាមរូបមន្តបរិញ្ញាបត្របូក ១ ទៅជាបវិញ្ញាបត្របូក ២ ទាំងអស់ ទាំងផ្នែកចំណេះទូទៅ និងផ្នែកអប់រំបច្ចេកទេស ហើយបញ្ជីប៉ុស្តិ៍កែសម្រួលថ្មី ត្រូវបញ្ចូនទៅកាន់ក្រសួងអប់រំ យុវជន និងកីឡា (នាយកដ្ឋានបុគ្គលិក) យ៉ាងយូរនៅថ្ងៃទី ៥ ខែមិថុនា ឆ្នាំ ២០២៣ វេលាម៉ោង ១៧ : ០០នាទី៕
