ក្នុងព្រឹត្តិការណ៍ស៊ីហ្គេម កីឡាចំនួន ៣ វិញ្ញាសា នឹងត្រូវប្រកួតនៅខេត្តព្រះសីហនុ

ក្រសួងព័ត៌មាន កាលពីថ្ងៃទី ២៣ ខែមីនា ឆ្នាំ ២០២៣ កន្លងទៅ បានចុះផ្សាយថា ដើម្បីចូលរួមត្រៀមការប្រកួតស៊ីហ្គេមនាពេលខាងមុខខេត្តព្រះសីហនុ នឹងត្រូវបានដាក់ឱ្យធ្វើជាម្ចាស់ផ្ទះចំពោះវិញ្ញាសាកីឡាចំនួន ៣ រួមមាន កីឡាបាល់ទះលើឆ្នេរខ្សាច់ កីឡាប្រណាំងម៉ូតូទឹក និង កីឡាប្រណាំងទូកក្តោង។

ជាមួយគ្នានេះដែរ លោក បុរី វង្សានិត ប្រធានមន្ទីរសាធារណការ និង ដឹកជញ្ជូនខេត្តព្រះសីហនុ បានឱ្យដឹងថា ដោយមានការចង្អុលបង្ហាញពីឯកឧត្តមអភិបាលខេត្ត និង គណៈកម្មការប្រកួតកីឡា មន្ទីរបាននឹងកំពុងរៀបចំទីលានប្រកួតកីឡាបាល់ទះនៅលើឆ្នេរខ្សាច់សម្រាប់កម្មវិធីស៊ីហ្គេម លើកទី ៣២ នៅចន្លោះថ្ងៃទី ៥ ដល់ថ្ងៃទី ១៧ ខែឧសភា ឆ្នាំ ២០២៣ ខាងមុខនេះ។ ហើយចំពោះការងាររៀបចំទីលានកីឡាបាល់ទះលើឆ្នេរខ្សាច់គឺ មន្ទីរធ្វើទៅតាមអ្វី ដែលជាការចង្អុលបង្ហាញរបស់គណៈកម្មការ ដោយមន្ទីរសាធារណការ និង ដឹកជញ្ជូនខេត្តជាអ្នករៀបចំទីលានប្រកួត កីឡានៅលើឆ្នេរខ្សាច់ ដែលមានទីតាំងស្ថិតនៅឆ្នេរពយជំទាវម៉ៅបន្ទប់ទឹកលេខ ១១ (ជិតដើមឈើចាំស្នេហ៍) ស្ថិតនៅក្នុងភូមិគគី ឃុំបិតត្រាំង ស្រុកព្រៃនប់ ខេត្តព្រះសីហនុ។

យ៉ាងណាមិញ សម្រាប់ការរៀបចំទីលានកីឡាលើខ្សាច់គឺ មាន ៣ ទីលាន ដោយទីលានទី ១ សម្រាប់ហាត់សម ហើយទីលានទី ២ និង ទី ៣ សម្រាប់ប្រកួតកីឡាបាល់ទះលើឆ្នេរខ្សាច់។ លើសពីនេះទៅទៀតលោកប្រធានមន្ទីរក៏បានឱ្យដឹងទៀតថា ការរៀបចំទីលាននេះគឺ មានការកាយដីចាស់ជម្រៅ ៤ តឹកចេញទើបមានការចាក់ខ្សាច់ចូលឡើងវិញ ដោយមានការរែងយកកាកសំណល់ ឫសឈើដុំថ្ម សំបកខ្ចៅខ្យង អំបែកដប ក៏ដូចជាកម្ទេចផ្សេងៗឱ្យបានស្អាត ទើបចាក់ខ្សាចចូលទៅវិញជៀសវៀងពេលការប្រកួតកីឡាបង្កឱ្យមានរបួសស្នាមដល់ក្រុមកីឡាករ ក៏ដូចជាភ្ញៀវទេសចរណ៍មកទស្សនាកម្សាន្ត។

គួរបញ្ជាក់ដែរថា នៅជុំវិញទីលានមន្ទីរគឺ បានកាត់ស្មៅស្អាតហើយ ដោយនៅជុំវិញបរិវេណប្រារព្ធពិធីក៏មានការតាំងពិព័រណ៍ ការប្រគំតន្ត្រីកម្សាន្តសប្បាយជូនបងប្អូនប្រជាពលរដ្ឋ ភ្ញៀវទេសចរណ៍ជាតិ និង អន្តរជាតិមកលេងកម្សាន្តផងដែរ៕

ប្រភព និង រូបភាពដោយ៖ ក្រសួងព័ត៌មាន និង Cambodia 2023