អបអរ! បូរណ៌មី ជាប់ Guiness World Record ត្រីទឹកសាបធំជាងគេលើលោក បំបែកកំណត់ត្រាត្រីនៅថៃ
ថ្មីៗនេះ វេបសាយកំណត់ត្រាពិភពលោក Guiness World Record បានបញ្ជាក់ពីការបញ្ចូលត្រីបបែលយក្ស ដែលទើបតែរកឃើញនៅកម្ពុជាមានឈ្មោះ «បូណ៌មី» បំបែកកំណត់ត្រាជាប្រភេទត្រីទឹកសាបធំជាងគេនៅលើពិភពលោក វ៉ាដាច់កំណត់ត្រាចាស់ត្រីប្រភេទ Catfish នៅប្រទេសថៃ ដែលបានរកឃើញកាលពីឆ្នាំ ២០០៥ កន្លងទៅ។
ចំពោះរឿងរ៉ាវ ត្រីបបែលយក្សនេះ កាលពីថ្ងៃទី ២០ ខែមិថុនា ឆ្នាំ ២០២២ កន្លងទៅ តាមរយៈ Wonders of the Mekong បានបញ្ជាក់ពីការរកឃើញត្រីបបែលយក្សទឹកសាបមួយក្បាល ទម្ងន់ ៣០០ គីឡូក្រាម ជាប់ឧបករណ៍នេសាទនៅតំបន់ជនបទនៃទន្លេមេគង្គ ជាកំណត់ត្រាពិភពលោកសម្រាប់ត្រីទឹកសាបដ៏ធំបំផុតមិនធ្លាប់មាននៅលើផែនដី។
ចំពោះរឿងនេះ Wonders of the Mekong បានបញ្ជាក់ឱ្យបានដឹងថា ក្រោយប្រទះឃើញវត្តមានត្រីបបែលយក្សទឹកសាបខាងលើ អ្នកនេសាទបានទាក់ទងក្រុមការងារគម្រោងអច្ឆរិយភាពនៃទន្លេមេគង្គ ហើយក៏បានបង្កើតជាចលនានៃការព្យាយាមបំពាក់ឧបករណ៍ទទួលសញ្ញាសូរស័ព្ទជាលើកដំបូង លើត្រីបបែលយក្សទឹកសាបនេះ។
ដោយក្តីស្រឡាញ់ ត្រីបបែលយក្សខាងលើ ត្រូវបានគេដាក់ឈ្មោះឱ្យថា «បូណ៌មី» ព្រោះក្រុមការងារបានលែងវាចូលទៅក្នុងទន្លេមេគង្គវិញ នៅថ្ងៃពេញបូណ៌មី ១៥ កើត។ ស្របទៅនឹងការព្រលែងនេះ ក្រុមការងារបានបំពាក់ឧបករណ៍ទទួលសញ្ញាសំឡេងសរុបចំនួន ៣៦ ដោយនឹងអាចប្រមូលទិន្នន័យ ស្តីពីការធ្វើចរាចរផ្លាស់ទី និង អាកប្បកិរិយារបស់វាជាលើកដំបូង។
សូមបញ្ជាក់ផងដែរថា គិតមកត្រឹមពេលនេះ ត្រីបបែលយក្សនៅកម្ពុជា ខាងលើ ជាប្រភេទត្រីទឹកសាបធំជាងគេបំផុតលើពិភពលោក បំបែកកំណត់ត្រាចាស់ នៃត្រីប្រភេទ Catfish នៅប្រទេសថៃ ដែលមានទម្ងន់ ២៩៣ គីឡូក្រាម រកឃើញនៅទន្លេមេគង្គ នាប្រទេសថៃ កំឡុង ខែមិថុនា ឆ្នាំ ២០០៥ កន្លងទៅ៕