ទឹកចិត្តប្រពៃ! នៅជីវិតចុងក្រោយ អ្នកគ្រូម្នាក់ប្រកាសបង្រៀនគួរអក្សរសាស្ត្រខ្មែរ មិនគិតលុយមួយរៀល
មហាជនអ្នកលេងបណ្ដាញសង្គមហ្វេសប៊ុក នាំគ្នាផ្ទុះការចាប់អារម្មណ៍ និង ស្ញើចសរសើរនូវទឹកចិត្តដ៏ថ្លៃថ្លា របស់គ្រូបង្រៀនអក្សរសាស្ត្រខ្មែរមួយរូប ដែលអ្នកគ្រូបានចំណាយវេលាចុងក្រោយនៃជីវិតរបស់ខ្លួន បង្ហាត់បង្រៀនមុខវិជ្ជាអក្សរសាស្ត្រខ្មែរ ទៅដល់កូនខ្មែរដែលត្រូវសិក្សាជំនាញនេះ ដោយមិនគិតថវិកាសូម្បីមួយរៀលនោះឡើយ។
អ្នកគ្រូដែលមានទឹកចិត្តថ្លៃថ្លាបវរប្រពៃរូបនេះ មានឈ្មោះថា នូយ៉ុន សុរិយា គឺជាគ្រូបង្រៀនអក្សរសាស្រ្តខ្មែរ ដែលកាលពីពេលថ្មីៗនេះ អ្នកគ្រូបានប្រកាសជម្រាបដល់សិស្សានុសិស្សទាំងអស់ឱ្យបានដឹងថា អ្នកគ្រូនឹងបង្រៀនគួរនៅសាលា CK (ជិតមាត់ស្ទឹងខាងផ្សារតាខ្មៅថ្មី) ថ្នាក់ទី ១១ និង ថ្នាក់ ១២ ដែលសិស្សានុសិស្ស ឬ អាណាព្យាបាល អាចទំនាក់ទំនងតាមរយៈលេខទូរស័ព្ទ 012 642 752 សម្រាប់ការចូលរៀន។
ក្នុងនោះផងដែរ ចំពោះការសិក្សានោះទៀតសោត គឺអ្នកគ្រូពុំយកកម្រៃ ឬ ថវិកាសម្រាប់ថ្លៃសិក្សាឡើយ ដោយអ្នកគ្រូបានធ្វើការបញ្ជាក់នៅលើគណនីខ្លួនផ្ទាល់ ឈ្មោះ Nou Yon Sorya ឱ្យបានដឹងថា ៖ «ខ្ញុំសូមជម្រាបមាតាបិតា អាណាព្យាបាល និង សិស្សានុសិស្សថា ខ្ញុំបង្រៀនគួរ តែមិនយកប្រាក់ទេ។ មូលហេតុគឺ ខ្ញុំចង់ធ្វើអ្វីម៉្យាងសម្រាប់ជីវិតចុងក្រោយឱ្យមានប្រយោជន៍ដល់សង្គម។ មិនមែនខ្ញុំពូកែជាងគេនោះទេ ប៉ុន្តែដែលអាចចែករំលែកបាន ក៏ធ្វើទៅ។ មិនបានប្រាប់ភ្លាមខ្លាចប៉ះពាល់អារម្មណ៍គេ។ ខ្ញុំចេះតែសួរខ្លួនឯងថា ចុះបរទេសខ្លះគេមកសង់សាលារៀន មន្ទីរពេទ្យ ចំណែកខ្ញុំវិញអាចធ្វើអ្វីបាន ក៏គួរតែធ្វើដែរ។ ដូចនេះ សូមមេត្តាជ្រាប។ សូមអរគុណ»៕
