រំភើបជំនួស! ឃើញប្អូនស្រីជាប់បាក់ឌុបភ្លាម ជូនទិញម៉ូតូថ្មីភ្លែត ហើយពោលពាក្យកក់ក្ដៅទាំងនេះ
នៅរសៀលថ្ងៃទី ១៤ ខែមករា ឆ្នាំ ២០២២ នេះ ក្រសួងអប់រំ យុវជន និង កីឡា បានចេញលទ្ធផលប្រឡងបាក់ឌុបសម័យប្រឡង ឆ្នាំ ២០២១ ក្នុងភូមិសាស្ត្ររាជធានីភ្នំពេញ និង ខេត្តកណ្ដាល។
តាមរយៈលទ្ធផលដែលប្រកាសនៅថ្ងៃនេះទៀតសោត មហាជននៅក្នុងបណ្ដាញសង្គម បាននាំគ្នាចាប់អារម្មណ៍ទៅលើបងប្រុសរបស់បេក្ខជនប្រឡងបាក់ឌុបមួយរូប ដែលស័ក្តិសមជាគំរូសម្រាប់បងប្រុសដទៃ ដោយសារតែគ្រាន់តែបានដឹងថាប្អូនស្រីរបស់ខ្លួនបានសម្រេចក្ដីប្រាថ្នា បានជាប់បាក់ឌុបភ្លាម ក៏សម្រេចចិត្តជូនទៅទិញម៉ូតូថ្មីចែសភ្លែតៗតែម្ដង។
ជាក់ស្ដែងតាមរយៈគណនីដែលជាបងប្រុស មានឈ្មោះ Binyan TV Show បានបញ្ជាក់ឱ្យបានដឹងថា ៖ «សូមអបអរសាទប្អូនស្រីជាទីស្រឡាញ់របស់ខ្ញុំ ប៊ីន សុភីន ដែលបានប្រឡងជាប់បាក់ឌុប នឹងជាជំហ៊ានឈានចូលទៅសាកលវិទ្យាល័យ សិក្សាឯកទេសផ្នែកគ្រប់គ្រងពាណិជ្ជកម្មអន្តរជាតិ ដែលប្អូនស្រឡាញ់។ ជូនពរឱ្យប្អូនស្រីកាន់តែជោគជ័យថែមទៀត។ ការដូម៉ូតូតូចនេះ បងទិញជូនដើម្បីលើកទឹកចិត្តប្អូនស្រី ដែលខិតខំប្រឹងប្រែង រយៈពេល ១២ ឆ្នាំកន្លងមក»។
ទន្ទឹមនឹងនោះ បងប្រុសយុវតីជាប់បាកឌុបខាងលើ បានពោលពាក្យផ្ដាំផ្ញើទៅកាន់ប្អូនស្រីជាទីស្រឡាញ់របស់ខ្លួនថា ៖ «ប្អូនមានរឿងជាច្រើនដែលនឹងត្រូវរៀនសូត្រ សិក្សាស្វែងយល់ ក្នុងវិថីនៃការប្រកួតប្រជែងខ្ពស់ ឆ្លងកាត់ការលំបាកច្រើនទៀត ប៉ុន្តែកុំចុះចាញ់ និង ខ្លាចដ្បិតអ្វីៗសុទ្ធតែជាមេរៀនទាំងអស់។ សង្ឃឹមថាប្អូនស្រីសម្រេចក្តីសុបិនទៅសិក្សានៅបរទេសឱ្យបាន។ ត្រូវចាំទុកសម្តីបងប្រុស «មនុស្សអស្ចារ្យមិនស្ថិតនៅពេលបច្ចុប្បន្ននោះទេ គឺស្ថិតនៅលើអនាគត ដែលយើងបានដៅទុក ហើយខិតខំដើរឆ្ពោះទៅរកវា ហើយនរណាមានគោលដៅធំ និង ប្រឹងប្រែងជាង អ្នកនោះហើយ នឹងខ្លាំងជាងនៅថ្ងៃខាងមុខ»៕