នៅព្រឹកថ្ងៃទី ១០ ខែមករា ឆ្នាំ ២០២២ នេះ សម្ដេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានថ្លែងឱ្យដឹងថា កាលពីថ្ងៃម្សិលមិញ កម្ពុជាបានរកឃើញករណីឆ្លងអូមីក្រុង ក្នុងសហគមន៍ចំនួន ៣ ករណី បន្ថែមទៀត ដែលនាំឱ្យករណីអូមីក្រុង ឆ្លងចូលសហគមន៍កើនឡើងដល់ ៤ ករណីហើយ ។
សម្ដេចថ្លែងបែបនេះ តាមរយៈការអញ្ជើញជាអធិបតីភាពដ៏ខ្ពង់ខ្ពស់ ក្នុងពិធីសម្ពោធដាក់ឱ្យប្រើប្រាស់ជាផ្លូវការ នូវកំណាត់ផ្លូវជាតិលេខ ៥ ពីខេត្តបាត់ដំបង ទៅក្រុងសិរីសោភ័ណ ខេត្តបន្ទាយមានជ័យ។
គួររំឭកផងដែរថា កាលពីថ្ងៃទី ០៨ ខែមករា ឆ្នាំ ២០២២ កន្លងទៅ ក្រសួងសុខាភិបាល បានប្រកាសពីការរកឃើញ ករណីវិជ្ជមានកូវីដ-១៩ បម្លែងខ្លួនថ្មីប្រភេទ «អូមីក្រុង» ជាលើកដំបូងក្នុងសហគមន៍ ចំនួន ១ នាក់ ទៅលើបុរសជនជាតិខ្មែរ អាយុ ២៣ ឆ្នាំ ស្នាក់នៅទួលសង្កែ ខណ្ឌឫស្សីកែវ រាជធានីភ្នំពេញ ដែលមានលទ្ធផលវិភាគបញ្ជាក់ដោយវិទ្យាស្ថាន ប៉ាស្ទ័រកម្ពុជា៕