ជំងឺរលាកសួតថ្មីដ៏កំណាច កំពុងផ្ទុះខ្លាំង ក្រសួងដាក់ម៉ាស៊ីនស្កេនតាមព្រលានយន្តហោះ ច្រកទ្វារអន្តរជាតិ
ជំងឺរលាកសួតដែលបង្ករឡើងដោយវីរុសប្រភេទថ្មីកូរ៉ូណា កំពុងផ្ទុះរីករាលយ៉ាងខ្លាំងនៅប្រទេសចិន ធ្វើឱ្យមនុស្សចំនួន ៩នាក់ហើយបានស្លាប់បាត់ជីវិត ។ នេះបើតាមការចុះផ្សាយរបស់ Chanel News Asia ។
បច្ចុប្បន្ននេះជំងឺប្រភេទថ្មីកំពុងរាតត្បាតទៅបណ្ដាប្រទេសមួយចំនួនទៀតដូចជា ថៃ កូរ៉េខាងត្បូង និងសហរដ្ឋអាមេរិក ។ ជំងឺនេះមានលក្ខណៈកាចសាហាវ អាចចម្លងពីមនុស្សទៅមនុស្សបាន និងអាចបណ្ដាលឱ្យស្លាប់បាត់បង់ជីវិតប្រសិនបើសង្គ្រោះមិនទាន់ពេលវេលា ។ ដោយឡែកក្រសួងសុខាភិបាលនៃព្រះរាជាណាចក្រកម្ពុជាក៏បានចេញសេចក្ដីប្រកាសព័ត៌មានជាបន្តបន្ទាប់ផងដែរ ស្ដីអំពីវិធានការនានាដើម្បីឱ្យបងប្អូនប្រជាពលរដ្ឋមានការប្រុងប្រយ័ត្ន និងយល់ដឹងអំពីវិធីការពារខ្លួន ។
ក្នុងនោះដែរបើតាមសេចក្ដីជូនដំណឹងរបស់ក្រសួងសុខាភិបាល ដែលចេញផ្សាយនៅថ្ងៃទី ២១ ខែមករា ២០២០ ក៏បានមបញ្ជាក់ដែរថា ក្រសួងបានដាក់ម៉ាស៊ីនស្កេនកំដៅនៅអាកាសយានដ្ឋានអន្តរជាតិទាំង ៣ ទីតាំង៖ ភ្នំពេញ, ព្រះសីហនុ, សៀមរាប និងនៅតាមច្រកព្រំដែនប៉ោយប៉ែត បាវិត ព្រែកចាក និងស្រាវជ្រាវរកករណីសង្ស័យដោយក្រុមចត្តាឡីស័កនៅតាមច្រកអាកាសយានដ្ឋានអន្តរជាតិ ព្រមទាំងបានត្រៀមបន្ទប់សម្រាប់ដាក់អ្នកជំងឺឱ្យនៅដាច់ដោយឡែកនៅមន្ទីរមិត្តភាពខ្មែរ-សូវៀត,មន្ទីរពេទ្យខេត្តព្រះសីហនុ,មន្ទីរពេទ្យខេត្តសៀមរាប ត្រៀមសម្ភារៈ បរិក្ខាពេទ្យ និងឱសថចាំបាច់សម្រាប់ការព្យាបាលផងដែរ ៕