Connect with us

ម៉ាក់​ម៉ាក់

ទង្វើភ្លាមៗដែលឪពុកម្តាយគួរធ្វើ នៅពេលដែលកូនខឹង និង មិនសប្បាយចិត្ត

on

Advertisement

នៅពេលដែល​ក្មេង​ពិបាកចិត្ត វា​អាចជា​រឿង​ពិបាក​មួយ​ក្នុងការ​ធ្វើ​ឲ្យ​គេ​មាន​អារម្មណ៍ល្អ​ឡើងវិញ​។ ក្មេងៗ​ដែល​ពិបាកចិត្ត​ជាប់​គឺ​ងាយ​នឹង​បញ្ចេញ​ភាព​តានតឹង​របស់គេ​ដាក់​មនុស្ស​ធំ​ណាស់​។ ម្យ៉ាងវិញទៀត គេ​អាច​នឹង​បង្កបញ្ហា​នៅ​សាលា និង​កន្លែង​ផ្សេងៗ​ទៀត​។ មិន​ខ្វល់​ថា អ្នកជា​ឪពុកម្តាយ​របស់​ក្មេង ឬ​កំពុងតែ​មើលថែទាំ​កូន​របស់​នរណា​ឡើយ យក​ល្អ​គួរតែ​ប្រើ​វិធីសាស្ត្រ​ខាងក្រោម​នេះ​ក្នុងការ​រំងាប់​អារម្មណ៍ និង​បន្ថយ​អារម្មណ៍​តានតឹង​របស់គេ​៖

​ប្រើ​វិធី​និយាយ​
​ចូរ​សួរ​គេ​ថា មាន​អ្វី​កើតឡើង ឬ​ខុស​ប្រក្រតី​៖ នេះ​គឺជា​វិធី​ដ៏​សំខាន់​មួយ​ក្នុងករណី​ដែល​អ្នក​មិនអាច​មើលឃើញ​ច្បាស់​ថា កូន​អ្នក​ពិបាកចិត្ត​ឬ​អត់​។ ទោះបីជា​អ្នក​ដឹងថា គេ​ពិបាកចិត្ត​ហើយក៏​ដោយ អ្នក​ក៏​ត្រូវតែ​ប្រើពាក្យ​សម្តី​និយាយ​ជាមួយ​គេ​ឲ្យ​បាន​ត្រឹមត្រូវ​ផង​។ ដល់ពេល​ដែល​គេ​យល់ថា អ្នក​បានផ្តល់​នូវ​អ្វី​ជា​ទំនុកចិត្ត​ដល់​គេ ជាពិសេស​តាមរយៈ​ការនិយាយ​បានល្អ ពេល​នោះគេ​នឹង​បង្ហាញ​អំពី​អារម្មណ៍ របស់​ពួកគេ​ឲ្យ​អ្នកដឹង​មិន​ខាន​។ បន្ទាប់មក អ្នក​អាច​និយាយ និង​ពិភាក្សា​អ្វី​ដែលជា​បញ្ហា​របស់គេ​បាន ដើម្បី​រក​ដំណោះស្រាយ​។

​វាយតម្លៃ​អារម្មណ៍​របស់គេ​៖ ធម្មតា ការយល់ដឹង​អំពី​អារម្មណ៍​របស់​ក្មេង​បាន​យ៉ាង​ល្អ នឹង​ជួយ​ឲ្យ​គេ​អភិវឌ្ឍន៍​បាន​នូវ​អារម្មណ៍​ថា​មាន​ទំនុកចិត្ត ជាពិសេស​ការស្រឡាញ់​ខ្លួនឯង​តែម្តង​។ ឧទាហរណ៍ បើសិនជា​កូន​អ្នក​ខឹង អ្នក​អាច​និយាយបានថា “​ប៉ា​អាច​ដឹងថា​ឥឡូវនេះ​កូន​កំពុង​ខឹង​។ ប៉ា​ដឹងថា​វា​ទំនងជា​ធ្វើ​ឲ្យ​មាន​អារម្មណ៍​ខឹង​ដែរ​។ ដូច្នេះ​វា​ពិតជា​មិន​អី​ឡើយ​ក្នុងការ​ដែលមាន​អារម្មណ៍​ខឹង​បែបនេះ​”​។ ប៉ុន្តែ​អ្នក​ត្រូវ​និយាយ​អ្វីៗ​ឲ្យ​មាន​ហេតុផល​ដើម្បី​គេ​ស្តាប់​យល់​ផង​។

​ធ្វើជា​អ្នក​ស្តាប់​ដ៏​ល្អ​ម្នាក់​៖ ការ​ស្តាប់​កូន​និយាយ​គឺជា​មធ្យោបាយ​ដ៏​ល្អ​បំផុត​ដើម្បី​គេ​ចង់​ស្តាប់​នូវ​អ្វីដែល​អ្នក​និយាយ​វិញ​។ វិធី​នេះ​នឹង​ជួយ​ឲ្យ​គេ​មាន​អារម្មណ៍​យល់ដឹង និង​មាន​មោនភាព​។ បើសិនជា​កូន​អ្នក​កំពុងតែ​ធ្វើ​អ្វីមួយ​ខុស​ហើយ ចូរ​ឲ្យ​គេ​ពន្យល់​អំពី​ហេតុផល​របស់គេ​សិន​ចាំ​អ្នកមាន​ប្រតិកម្ម​នឹង​សកម្មភាព​ទាំងនោះ​ក្រោយ​។

​ពន្យល់​អំពី​ការសម្រេចចិត្ត​របស់​អ្នក​៖ នៅពេលដែល​អ្នក​ចង់​បង្ការ​កុំ​ឲ្យ​កូន​ធ្វើ​អ្វីមួយ​នោះ យក​ល្អ​គួរតែ​អនុវត្ត​ពន្យល់​គេ​ថា ហេតុអ្វី​បានជា​ត្រូវធ្វើ​បែបនេះ ឬ​បែប​នោះ​។ រឿងនេះ​នឹង​ជំរុញ​ឲ្យ​គេ​បង្កើតបាន​នូវ​ការសម្រេចចិត្ត​ដ៏​គំរូ​មួយ ហើយក៏​មានការ​គោរព​រវាង​អ្នកនឹង​គេ​កាន់តែ​ល្អ​ជាង​មុន​ដែរ​។

​ធ្វើ​សកម្មភាព​ដើម្បី​រំងាប់​អារម្មណ៍​កូន​
​រកមើល​សញ្ញា​នៃ​ការខឹង ឬ​ពិបាកចិត្ត​របស់​កូន​៖ វា​គឺជា​រឿង​សំខាន់​ណាស់​ដែល​អ្នក​ត្រូវ​ដឹង​អំពី​អាកា​រៈ​នៃ​ការខឹង ឬ​ពិបាកចិត្ត​របស់​ក្មេង​ទោះបីជា​អ្នក​មិនទាន់​និយាយ​ជាមួយ​គេ​ក៏ដោយ​។ ពួកគេ​អាច​បង្ហាញ​តាមរយៈ​សកម្មភាព​ខាងក្រៅ​ដូចជា ក្តាបដៃ​ជាប់ ក្តាប់​អាវ ឬ​របស់​អ្វីមួយ​យ៉ាង​តឹង ធ្វើ​ទឹកមុខ​ខឹង ឬ​ប្រើ​សម្តី​និយាយ​គ​ម្រោះ​គម្រើយ ឬ​ស្រែក​ខ្លាំងៗ​ជាដើម​។ ម្យ៉ាងវិញទៀត អ្នក​ក៏​អាច​ប្រើ​វិធី​សម្រួល​អារម្មណ៍​ផ្លូវចិត្ត​របស់​ក្មេង ដោយ​ការ​អង្អែល​ក្បាល ឬ​អោប​គេ​ដើម្បី​បង្ហាញ​អារម្មណ៍​ស្រឡាញ់ ដល់ពេល​នោះគេ​នឹង​អាច​ធូរស្រាល​ក្នុង​អារម្មណ៍​បាន​កាន់តែច្រើន​ដែរ​។

​សើច​លេង​ជាមួយ​គេ​៖ ការ​សើច​គឺជា​មធ្យោបាយ​ដ៏​ល្អ​មួយ​ក្នុងការ​បន្ធូរ​ភាព​តានតឹង និង​បំបាត់​អារម្មណ៍​ដែល​ពិបាកៗ​ក្រោយពី​កូន​មិន​សប្បាយចិត្ត​។ ដូច្នេះ​អ្នក​អាចធ្វើ​រឿង​អ្វី​ម្យ៉ាង​ដើម្បី​ឲ្យ​កូន​សើច​បាន ដូចជា និយាយ​រឿង​កំប្លែង ឬ​មើល​ប៉ុស្តិ៍​ទូរទស្សន៍​ដែល​និយាយ​អំពី​រឿង​គួរ​ឲ្យ​អស់សំណើច​ជាដើម​។ ម្យ៉ាងវិញទៀត អ្នក​អាច​ឈ្លៀត​ឱកាស​នេះ នាំ​គេ​ទៅ​កន្លែង​ដែល​អាច​បំបាត់​អារម្មណ៍​តានតឹង​បានដែរ ដូចជា​សួន​កុមារ​ជាដើម​។ ប៉ុន្តែ​អ្វីដែល​សំខាន់​នោះ អ្នក​ត្រូវតែ​ចេះ​គ្រប់គ្រង​ភាព​ឆេវឆាវ​របស់គេ​នៅពេល​ខឹង​ផង ព្រោះ​ពួកគេ​ងាយ​នឹង​បង្ក​របួសស្នាម​ដល់​ខ្លួនឯង ឬ​អ្នកដទៃ​ខ្លាំងណាស់​។ ដើម្បី​ស្រួល គួរតែ​នៅ​ជិត​គេ​ឲ្យ​បាន​ច្រើន​ផង​។

​ចូរ​និយាយ​អ្វី​ដែលជា​សកម្ម​ភាពល្អៗ​៖ វា​គឺជា​រឿង​មួយ​មាន​ប្រសិទ្ធភាព​ណាស់​ក្នុង​ការបង្ហាញ​នូវ​អ្វីៗ​ដែល​កូន​អ្នក​បានធ្វើ​ត្រូវ​ពីមុនមក និង​ចៀស​ជាង​និយាយ​តែ​ពី​ការដាក់ទោស​លើ​សកម្មភាព​មិនល្អ​ដែល​ពួកគេ​បានធ្វើ​។ អ្នក​ពិតជា​មិនអាច​ចៀស​ផុតពី​ការដាក់ទោស​កូន​ទេ តែ​បើសិនជា​អាច ចូរ​រងចាំ​សិន​ទៅ​។ អ្វីដែល​អ្នក​គួរតែ​ធ្វើ គឺ​ត្រូវ​ផ្តល់​ស្នាមញញឹម និង​អោប​គេ​ជានិច្ច​ដើម្បី​រក្សា​ទំនាក់ទំនង​ល្អជា​មួយ​គេ​។ បើសិនជា​អាច គួរតែ​យកចិត្តទុកដាក់​ទៅលើ​រឿង​វិជ្ជមាន​របស់​កូន​អ្នក​ឲ្យ​បាន​ច្រើនជាង​។

​បង្រៀន​កូន​ឲ្យ​ចេះ​រំងាប់​អារម្មណ៍​ខ្លួនឯង​៖ វា​ពិតជា​គំនិត​ដ៏​ល្អ​មួយ​ក្នុងការ​បង្ហាញ​កូន​អ្នក​អំពី​របៀប​ដែល​ពួកគេ​អាច​រំងាប់​អារម្មណ៍​ខឹង និង​ពិបាកចិត្ត​របស់គេ​បាន​។ ចូរ​បង្រៀន​គេ​នូវ​គន្លឹះ​ខ្លះៗ​ដូចជា ការជួយ​អង្អែល​ខ្នង​គេ ផ្តល់​ឲ្យ​គេ​គូររូប​ដែល​គេច​ង់​គូរ ឲ្យ​គេ​ដកដង្ហើម​ជ្រៅៗ ឬ​ផ្តល់​ជា​តុក្កតា​ធំៗ​ដែល​គេ​អាច​អោប ឬ​ប៉ះពាល់​ដើម្បី​សម្រាល​ភាព​តានតឹង​ក្នុង​អារម្មណ៍​បាន​។

​កុំ​ភ្លេច​រំងាប់​អារម្មណ៍​ខ្លួនឯង​ផង​
​រឿង​ដ៏​សំខាន់​មួយ​ដែល​អ្នក​អាច​រំងាប់​អារម្មណ៍​កូន​បាន គឺ​ធ្វើ​ឲ្យ​ខ្លួនឯង​ចិត្ត​ត្រជាក់​សិន ព្រោះថា​ក្មេង​នឹង​មើល​មក​អ្នក​ហើយ​អាច​គិតថា តើ​អ្នក​ប្រើ​កាយវិការ​បែបណា​ដែរ​។ បើសិនជា​អ្នកមាន​ប្រតិកម្ម​ខ្លាំង ពេលនោះ​ពួកគេ​នឹង​រៀន​តាម​យ៉ាង​ស្រួល​។ ចូរ​ចៀសវាង​សកម្មភាព​គ្រោះថ្នាក់​ដូចជា ការស្រែក​ខ្លាំងៗ​ដាក់​គេ​។ មួយវិញទៀត អ្នក​ក៏ត្រូវ​ចេះ​ដកដង្ហើម​ជ្រៅៗ​ដែរ ដើម្បី​អាច​ប្រមូល​អារម្មណ៍​ពន្យល់​បានល្អ ដើម្បី​ឲ្យ​កូន​ស្តាប់​យល់ និង​ធ្វើតាម​។ ដល់ពេល​ដែល​អ្នក​ណែនាំ​កូន​នូវ​ទង្វើរ​ណាមួយ​ដែល​គេ​បានធ្វើ​ខុស ចូរ​ស្វែងយល់​អំពី​ហេតុផល​របស់​ពួកគេ​ឲ្យ​ច្បាស់​ផង ដើម្បី​ចៀសវាង​ការប៉ះទង្គិច​ផ្លូវចិត្ត​របស់គេ ជាពិសេស​ខ្លាច​ថ្ងៃក្រោយ​គេ​មិន​ហ៊ាន​និយាយ​អំពី​ហេតុផល​របស់ខ្លួន​គ្រប់ពេល​ធ្វើ​អ្វីៗ​ទាំងអស់​៕

​ប្រែ​សម្រួល​៖ វេជ្ជ​. ម៉េង សុខ​សៀន​
(​ប្រភព ៖ wikihow )

អត្ថបទដោយ​៖ Chan Tha

អត្ថបទពេញនិយម

កែវ នីសា អាយុក្បែរ ៤០ ឆ្នាំហើយ តែសម្រស់នៅខ្ញង់គ្មានទាស់
តែមួយប៉ព្រិចភ្នែក តារាចម្រៀងវ័យក្មេងទាំងនេះ ធំពេញរូបពេញរាង ម្នាក់ៗស្អាតឡើងខ្ញង់
វត្តឈើខ្មៅ នៅបាត់ដំបងមានអាយុកាល ១៣៣ ឆ្នាំ ផុសឡើងកណ្ដាលបឹងទន្លេសាប ស្អាតក្រៃលែង
នេះជាប្រវត្តិដ៏អស្ចារ្យរបស់លោកកាពីទែន ដែលស៊ូស្លាប់ឱបចង្កូតកាប៉ាល់ Titanic

មតិរបស់អ្នក