អូហ៍អ៊ីចឹងសោះ ! ហេតុផល ៦ យ៉ាងនេះហើយ ទើបនារីខ្មែរមួយចំនួនចង់បានប្ដីអាគាំង
ជារឿយៗគេតែងឃើញនារីខ្មែរមួយចំនួនបង្កើតចំណងស្នេហ៍ជាមួយសាសន៍ដទៃ ហើយគូខ្លះបានរួមរស់ជាមួយគ្នាបង្កើតគ្រួសារមួយយ៉ាងមានសុភមង្គល ។ ក្រៅពីការស្រឡាញ់គ្នាឈានដល់ការរៀបការ តើមានហេតុផលអ្វីខ្លះបានជានារីខ្មែរមួយចំនួនសម្រេចចិត្តយកស្វាមីបរទេស ? ខាងក្រោមនេះជាហេតុផលបញ្ជាក់យ៉ាងច្បាស់នូវចម្ងល់នេះ ៖
១. មានឱកាសទៅរស់នៅ ឬ ដើរលេងនៅបរទេស
មាននារីខ្មែរមិនតិចឡើយមានវាសនាបានទៅរស់នៅបរទេស ក្រោយរៀបការជាមួយជនជាតិដទៃ ។ ហេតុនេះទើបស្រីៗមួយចំនួនជាអ្នកដែលមានក្ដីស្រមៃចង់ផ្លាស់ប្ដូរជីវិតរស់នៅរបស់ខ្លួនឯង តែងគិតថា បើបានរៀបការជាមួយបរទេសប្រាកដជាមានឱកាសស្គាល់ទឹកដីគេមិនខាន ទោះមិនបានទៅរស់នៅក៏បានដើរលេងដែរ ។
២. មានជីវភាពធូរធារ
ជារឿងដែលគេល្បីតៗគ្នាថា បានប្ដីអឺរ៉ុប ប្ដីអាគាំង គឺមិនខ្វះទេលុយចាយ ។ មិនមែនមានន័យថានារីទាំងអស់សុទ្ធតែគិតបែបនេះឡើយ តែសំដៅដល់អ្នកដែលជ្រើសរើសយកប្ដីបរទេសគឺតែងគិតដល់ចំណុចនេះដែរ ។ រៀបការជាមួយអ្នកមានធនធានច្រើនជាចំណុចល្អមួយជួយឱ្យមានជីវភាពធូរធារ និង មានដើមទុនក្នុងការបង្កើតអាជីវកម្មអ្វីមួយ ។
៣. កូនកើតមកស្អាតខ្លាំង
ធ្លាប់ឮគេនិយាយថា បើបានប្ដីបរទេសកូនកើតមកដឹងតែស្អាតហើយ ។ នេះជាការពិតមួយដែលមិនអាចប្រកែកបាន កូនដែលមានឪពុកម្ដាយពីរសាសន៍ផ្សេងគ្នាតែងមានរូបរាងស្អាតប្លែក ខុសពីក្មេងដទៃ ។ កត្តានេះក៏ជាចំណុចពិសេសមួយទៀត ចំពោះនារីដែលមានស្វាមីជាសាសន៍ផ្សេង ។
៤. កូនឆាប់ចេះភាសាបរទេស
ភាសាបរទេស ពិសេសភាសាអង់គ្លេសពិតជាមានសារសំខាន់ខ្លាំងក្នុងការទំនាក់ទំនងជុំវិញពិភពលោក ។ កូនដែលមានឪពុកប្រើប្រាស់ភាសាអង់គ្លេស គឺងាយនឹងរៀនភាសាអង់គ្លេសចេះណាស់ ព្រោះគេមានសែស្រឡាយឪពុកជាអ្នកនិយាយភាសានេះ ។
៥. ផ្លាស់ប្ដូរវប្បធម៌រវាងប្រទេសមួយទៅប្រទេសមួយ
ប្រាកដណាស់ នៅពេលរៀបការជាមួយជនជាតិដទៃ គឺអាចស្វែងយល់ពីវប្បធម៌ ប្រពៃណី ទំនៀមទម្លាប់ របស់ប្រទេសនោះ ហើយក៏អាចចែករំលែកនូវវប្បធម៌ខ្មែរទៅស្វាមីបានដូចគ្នាដូចជា ការសំពះ របៀបរបបការរស់នៅជាដើម ។
៦. ទទួលបានចំណេះដឹងថ្មីៗ
រឿងមួយចំនួនដែលមិនធ្លាប់បានជួប ឬ មិនដែលបានធ្វើពីមុន នឹងបានឃើញ បានធ្វើ ពេលរៀបការជាមួយបរទេស ។ មិនថារបៀបរបបការញ៉ាំអាហារ ការធ្វើម្ហូប ឬ ការទំនាក់ទំនងនោះទេ សុទ្ធតែជាចំណេះដឹងថ្មីៗអាចរៀនសូត្របាន ៕
អត្ថបទ ៖ រាជ