ភ្ជាប់ពាក្យរួច ប៉ាច គីមមួយ ប្រាប់ថាជីវិតគូមិនមែនគ្រាន់តែស្រឡាញ់គ្នាមួយមុខទេ
តារាចម្រៀងប្រុសស្រីប្រចាំផលិតកម្មរស្មីហង្សមាស ប៉ាច គីមមួយ និង សយ រតនៈ បានដឹកដៃគ្នាប្រារព្ធពិធីភ្ជាប់ពាក្យធំដុំមួយកាលពីថ្ងៃទី ១ ខែកក្ដដា ឆ្នាំ ២០២២ កន្លងទៅ ដោយកម្មវិធីភ្ជាប់ពាក្យ និង ឡើងគេហដ្ឋានថ្មីរបស់ពួកគេទាំងពីរ ក៏មានវត្តមានអ្នកសិល្បៈដែលជារៀមច្បង និង មិត្តភក្ដិក្នុងរង្វង់សិល្បៈជាច្រើនចូលរួម។
មុនឈានដល់ពិធីភ្ជាប់ពាក្យជ្រើសរើសគ្នាជាគូជីវិត ត្រៀមបង្កើតគ្រួសារមួយដ៏កក់ក្ដៅជាមួយគ្នានៅថ្ងៃអនាគត សយ រតនៈ និង ប៉ាច គីមមួយ បានស្រឡាញ់ស្គាល់ចិត្តថ្លើមគ្នារយៈពេលខ្ទង់ ៥ ឆ្នាំមកហើយ ដោយកន្លងមកពួកគេតែងបង្ហាញក្ដីស្នេហ៍ដ៏ផ្អែមល្ហែមរវាងគ្នានឹងគ្នា បណ្ដើរគ្នាទៅចូលរួមកម្មវិធីផ្សេងៗយ៉ាងត្រសងបង្ហោះលើបណ្ដាញសង្គម អ្នកគាំទ្រឃើញហើយនាំគ្នាសរសើរថាស័ក្ដិសមគ្នាខ្លាំង ព្រោះមិនថារូបសម្បត្តិ កម្ពស់សម្ពរ ឬទេពកោសល្យផ្នែកសិល្បៈទេ ពួកគេសុទ្ធតែសមគ្នា។
ក្រោយប្រកាសឱ្យមហាជនដឹងឮថាតារាចម្រៀងប្រុសស្រីមួយគូនេះ គឺជាគូដណ្ដឹងរងចាំតែថ្ងៃចូលរោងការ ស្រាប់តែស្រីស្អាត ប៉ាច គីមមួយ បានសរសេរសាររៀបរាប់នៅលើហ្វេសប៊ុកពីទំនាក់ទំនងពួកគេថា ៖ «ចាប់ពីថ្ងៃនេះទៅយើងចាប់ផ្តើមរៀនទៀតហើយ…គឺរៀនស្វែងយល់ពីគ្នាបន្ថែមទៀត ព្រោះគ្រាន់តែស្រឡាញ់គ្នា គ្រាន់តែច្បាស់លាស់ជាមួយគ្នា វាមិនទាន់គ្រប់គ្រាន់ទេ ក្តីស្រឡាញ់ ទាល់តែយល់ពីគ្នាឱ្យច្រើន ឱ្យតម្លៃគ្នាឱ្យច្រើន គោរពគ្នា ទើបនៅមួយគ្នាមានក្តីសុខ»៕
រូបភាព៖ FB Pach Kimmouy
