Mai តបទៅវិញផាំងៗមិនចាំស្អែក ក្រោយសម្បូរអ្នកជំរិតសួររឿងពេលណារៀបការ
មួយរយៈក្រោយនេះ គេសង្កេតឃើញថាមានគូស្នេហ៍តារាប្រុសស្រីថៃល្បីៗជាច្រើនគូ បានប្រកាសដំណឹងល្អ ត្រៀមដឹកដៃគ្នាចូលរោងការ ដោយមានមកបន្តកន្ទុយគ្នាជាប់មិនដាច់ ចាប់តាំងពីដើមឆ្នាំរហូតមកដល់ពេលនេះ។
ក្នុងនោះគូស្នេហ៍តារាប្រុសស្រី Ter Chantavit និង Mai Davika ហាក់គេចមិនរួចពីក្រសែភ្នែកមហាជននោះឡើយ ដោយអ្នកទាំងពីរត្រូវអ្នកគាំទ្រតាមសួរជារឿយៗ ពីរឿងដំណឹងរៀបការ។
ក្រោយមានគេតាមសួរបែបនេះជាញឹកញាប់ Mai ក៏បានឆ្លើយតបថា៖ «ដែលធ្លាប់ឆ្លើយថាមិនទាន់ព្រម គឺមិនមែនមានន័យថា ខ្ញុំបដិសេធទេ តែដោយសារទាំងខ្ញុំ និង បង Ter គឺពួកយើងមិនទាន់បានគិតរឿងនេះជាចំណុចសំខាន់ក្នុងជីវិតនៅឡើយ ដោយសារនៅចង់ធ្វើការបន្តិចទៀតសិន អ៊ីចឹងសុំរង់ចាំបន្តិចទៀតចាស៎! អាចនឹងប្រើពេលបន្តិច ហើយខ្ញុំក៏មិនដឹងថា អនាគតវាយ៉ាងណា តែសព្វថ្ងៃនេះ គឺពួកយើងចង់ធ្វើការរៀងខ្លួនសិន តែចំពោះរឿងស្នេហា គឺពួកយើងមិនមានបញ្ហានឹងគ្នានោះឡើយ គឺនិយាយជាមួយគ្នារាល់ថ្ងៃ ហើយមានទំនាក់ទំនងល្អចំពោះគ្នា»៕