ARMYs ផ្ទុះការមិនពេញចិត្ត ក្រោយឮសម្ដីប្រធានសមាគមសិល្បៈកូរ៉េឱ្យ BTS ពិចារណារឿងនេះ

ដូចដែលប្រិយមិត្តមួយចំនួនបានដឹងរួចមកហើយ កាលពីថ្ងៃទី ២២ ខែមិថុនានេះ អ្នកស្រី Lee Ja Yeon ដែលជាប្រធានសមាគមសិល្បៈអ្នកចម្រៀងប្រចាំប្រទេសកូរ៉េខាងត្បូង បានចេញសេចក្តីថ្លែងការណ៍ជាផ្លូវការមួយដើម្បីផ្ញើសារទៅកាន់ BTS និង ផលិតកម្ម HYBE អំពីការពិចារណាឡើងវិញពីការផ្អាកសកម្មភាពជាក្រុម (Group Hiatus)។

សេចក្តីថ្លែងការណ៍មួយនេះបានចេញគឺបន្ទាប់ពី BTS ប្រកាសថា ពួកគេនឹងសម្រាកសកម្មភាពជាក្រុម ដើម្បីមានឱកាសសម្រាប់បន្តរការរីកចម្រើនបន្ថែមទៀតក្នុងនាមជាអ្នកសិល្បៈទោល ហើយវាក៏អាចនឹងជាមូលហេតុមួយយ៉ាងសំខាន់ក្នុងការបន្តឈ្មោះ BTS ជាក្រុមបានយូរអង្វែងផងដែរ។

បើទោះបីជាព័ត៌មានមួយនេះធ្វើឱ្យ ARMYs (ជាឈ្មោះតំណាងអ្នកគាំទ្រ BTS) ជាច្រើនមានការភ្ញាក់ផ្អើលខ្លាំង ប៉ុន្តែពួកគេនៅតែគាំទ្រការសម្រេចចិត្តរបស់សមាជិក ហើយបានបង្ហាញការគាំទ្រយ៉ាងពេញទំហឹងចំពោះការចេញសម្ដែងជាលក្ខណៈទោល (Solo Debut) របស់សមាជិកនីមួយៗផងដែរ។

យ៉ាងណាមិញ បន្ទាប់ពី ARMYs បានឃើញសេចក្តីថ្លែងការណ៍ពីខាងសមាគមតារាចម្រៀងកូរ៉េរួចមក អ្នកគាំទ្រជាច្រើនកំពុងតែបង្ហាញភាពមិនពេញចិត្ត និង សុំកុំឱ្យពួកគេលូកដៃចូលរឿង BTS ជាពិសេសគឺគោរពនូវការសម្រេចចិត្តរឿងដែលពួកគេបានប្រកាសជាសាធារណៈមួយនេះ។

មិនតែប៉ុណ្ណោះ អ្នកគាំទ្រជុំវិញពិភពលោកបានបញ្ចេញអារម្មណ៍ និងភ្ជាប់ជាមួយនឹងឃ្លាមួយគឺ «#BTSItsOkayToRest» នៅក្នុងបណ្ដាញសង្គម Twitter ឡើងភ្លូកទឹក ភ្លូកដី រហូតជាប់ចំណាត់ថ្នាក់ទី ១ ជុំវិញភិភពលោក។ យ៉ាងណាមិញ ឃ្លាមួយនេះចង់សំដៅថា BTS គឺសមនឹងទទួលបានការសម្រាកដូចអ្វីដែលពួកគេចង់បាន៕