Ter ធ្លាប់ឆ្លើយផាំងៗ ពេលគេសួរក្រុមគ្រួសារសងខាងគិតយ៉ាងម៉េចចំពោះស្នេហាជាមួយ Mai?

រំឭកដល់ឈ្មោះតារាស្រី Mai Davika និង អ្នកកំលោះសង្ហា Ter Chantavit ប្រិយមិត្តប្រាកដជាដឹងភ្លាមថា អ្នកទាំងពីរជាគូស្នេហ៍នឹងគ្នា។ ពិសេស បើគិតមកត្រឹមពេលនេះរយៈពេល ៥ ឆ្នាំទៅហើយ ដែលអ្នកទាំងពីរបានចាប់ដៃគ្នាសាងស្នេហាយ៉ាងផ្អែមល្ហែមដោយបើកចំហតែម្តង។

លើសពីនេះទៅទៀត អ្វីដែលសំខាន់ថ្មីៗនេះ មហាជនហាក់ចាប់អារម្មណ៍ជាខ្លាំងទៅលើគូស្នេហ៍អ្នកទាំងពីរ ខណៈតារាស្រី Mai បង្ហាញចិញ្ចៀនពេជ្រនៅលើដៃឆ្វេង ដែលធ្វើឱ្យអ្នកគាំទ្រយល់ច្រឡំថា ជាចិញ្ចៀនដែល Ter បំពាក់ឱ្យ ឬ យ៉ាងណា? តែការពិតទៅវាជាកាដូដែលតារាស្រី Mai ទិញឱ្យខ្លួនឯងសោះ។

យ៉ាហណាមិញ បន្ទាប់ពីលេចរឿងចិញ្ចៀន ក៏ដូចជាចចាមអារាមថាលោក និង គូស្នេហ៍មានដំណឹងល្អ ស្រាប់តែ Ter បានលេចមុខបង្ហើបរឿងរ៉ាវស្នេហ៍របស់លោក ក៏ដូចជារឿងគ្រួសារទាំងសងខាងប្រាប់ដល់អ្នកគាំទ្រ និង អ្នកសារព័ត៌មានបានជ្រាបកាលពីពេលកន្លងថា Mai ជានារីម្នាក់ដែលលោកគិតថាជាគូអនាគតរបស់លោក ហើយបើនិយាយពីរឿងចិញ្ចៀនវិញ ប្រសិនបើថ្ងៃនោះនឹងមកដល់ លោកប្រាកដជាត្រូវឱ្យកាដូធំជាងអ្វីដែលម្ចាស់ខ្លួនគេទិញឱ្យខ្លួនឯងហើយ។

ចំណែករឿងគ្រួសារ Ter ក៏បានទម្លាយបន្ថែម បន្ទាប់ពីអ្នកសារព័ត៌មានសួរទៅកាន់លោកថា តើគ្រួសារទាំងសងខាងយល់យ៉ាងម៉េចដែរ ខណៈដឹងថាអ្នកទាំងពីរមានទំនាក់ទំនងនឹងគ្នា?

ភ្លាមនោះ Ter ក៏បានឆ្លើយដោយមិនលាក់លៀមថា គ្រួសារទាំងសងខាងបានដឹងឮហើយ។ ដោយឡែក លោកក៏បានជួបជាមួយគ្រួសារខាងតារាស្រី Mai ហើយដែរ ដោយលោកឃើញថាគ្រួសាររបស់ Mai នៅបង្ហាញក្តីបារម្ហ ហួងហែងដល់កូនស្រីនៅឡើយ តែទោះជាយ៉ាងណាលោកបានសន្យា និង សម្តែងឱ្យគ្រួសារខាងស្រីឃើញ និង ជឿជាក់លើរូបលោកថា លោកពិតជាអាចមើលថែកូនស្រីរបស់លោកទាំងពីរបាន មិនថាមានរឿងអ្វីកើតឡើងក៏ដោយនោះ៕