ស្មានថា ករុណា ពេជ្រ និង នារីរូបស្រស់នោះជាគូគាប់ ពេលដឹងការពិត បាក់ចង្កេះ!

ថ្មីៗនេះ មហាជននិយមលេងបណ្តាញសង្គមហ្វេសប៊ុក ជាពិសេសអ្នកគាំទ្រតារាចម្រៀងប្រចាំផលិតកម្មថោន គឺលោក ករុណា ពេជ្រ កំពុងតែចាប់អារម្មណ៍យ៉ាងខ្លាំង បន្ទាប់ពីតារាចម្រៀងប្រុសរូបនេះ បានបង្ហោះរូបស្និទ្ធស្នាលជាបន្តបន្ទាប់ជាមួយនឹងនារីដ៏ស្រស់ស្អាតម្នាក់ ។ លើសពីនោះ រូបភាពទាំងនោះបានបង្ហាញថាលោក ករុណា ពេជ្រ និង នារីរូបនោះ មានភាពស្និទ្ធស្នាលនឹងគ្នាយ៉ាងខ្លាំង ប្រៀបដូចជាសង្សារខណៈពួកគេបានទៅបោះតង់កម្សាន្តនៅឯទឹកជ្រោះយ៉ាងរ៉ូមែនទិកទៀតផង ។

ជាការពិតណាស់ ចូលប្រឡូកក្នុងវិស័យសិល្បៈប្រមាណជាជិត ២០ ឆ្នាំមកនេះ លោក ករុណា ពេជ្រ មិនដែលលេចឭដំណឹងថាលោកមានម្ចាស់បេះដូងម្តងណាឡើយទេ ដែលនេះជាហេតុធ្វើឱ្យមហាជនមានការសង្ស័យព្រោងព្រាតថា នារីរូបនោះអាចជាគូស្នេហ៍លោកផងមិនដឹង ។

យ៉ាងណាមិញ ក្រោយពីមានការសង្ស័យយ៉ាងច្រើនពេញបណ្តាញសង្គមហ្វេសប៊ុកនោះ ម្ចាស់សាមីខ្លួនក៏មិនទាន់បានបញ្ជាក់ច្បាស់នៅឡើយនោះទេ តែយ៉ាងណាក្តីបើតាមប្រភពស្និទ្ធស្នាលបានឱ្យដឹងថា នារីស្អាតរូបស្រស់ថតនៅក្បែរកៀកកើយលោក ករុណា ពេជ្រ រូបនោះ គឺជាតារាសម្តែងកញ្ញា កុសម៉ា ភីរ៉ាផា ។ ជាងនេះទៅទៀត រូបភាពដែលកំពុងចែកចាយបង្ហោះព្រោងព្រាតនោះ គឺជាការសម្តែងចម្រៀងកាយវិការក្នុង MV ថ្មីរបស់លោក ករុណា ពេជ្រ មានចំណងជើងថា «មន្តស្នេហ៍កំពង់ស្ពឺ» ។

គួរបញ្ជាក់បន្ថែមថា MV «មន្តស្នេហ៍កំពង់ស្ពឺ» នេះ ជាបទចម្រៀងដំបូងហើយនៅក្នុងឆ្នាំ ២០២១ នេះ របស់លោក ករុណា ពេជ្រ បន្ទាប់ពីលោកបានផ្អាកការចេញបទចម្រៀងថ្មីអស់រយៈពេលជាយូរមកនេះ ក៏ព្រោះតែការមមាញឹកក្នុងការមើលថែលោកឪពុកនោះ ៕