ធ្លាប់តែឃើញសង្ហា ដល់ឃើញម្ដងនេះ យុត្ថារ៉ា ឆានី បាក់សម្រស់ប្លែកខ្លាំង
លោក យុត្ថារ៉ា ឆានី គឺជាតួឯកកុនដែលធ្លាប់ទទួលបានការកោតសរសើរយ៉ាងច្រើនផុសផុលពីសំណាក់ទស្សនិកជន ដោយក្រៅពីទេពកោសល្យផ្នែកសិល្បៈដ៏ប៉ិនប្រសប់របស់លោកហើយ អតីតតារាប្រុសរូបនេះ ក៏ត្រូវបានអ្នកគាំទ្រចាប់អារម្មណ៍ពេញចិត្តទៅលើមុខមាត់ស្រស់សង្ហា កម្ពស់កម្ពរសមនឹងដងខ្លួន ជាមួយនឹងស្នាមញញឹមមានមន្តស្នេហ៍របស់លោក ។
ដោយឡែកស្រាប់តែថ្មីៗនេះ ប្រិយមិត្តដែលធ្លាប់ស្រឡាញ់គាំទ្រលោកកន្លងមកមានការភ្ញាក់ផ្អើលយ៉ាងខ្លាំង បន្ទាប់ពីឃើញលោក យុត្ថារ៉ា ឆានី បានបង្ហោះរូបថតលោក និង កូនៗ ប៉ុន្មានសន្លឹកនៅលើគណនីហ្វេសប៊ុកផ្ទាល់ខ្លួន ក្នុងរូបរាងកោរសក់រលោងស្រិល មានដុះពុកមាត់ពុកចង្កាស្រមេមស្រមាម មើលទៅបាក់សម្រស់ប្លែកខ្លាំង មិនស្រស់សង្ហាដូចដូចកាលពីមុនទៀតឡើយ ។
ដ្បិតថាប៉ុន្មានឆ្នាំចុងក្រោយនេះ លោក យុត្ថារ៉ា ឆានី ប្រែរូបរាងទៅជាបែកសាច់ឡើងគីឡូជាងមុន ក្រោយបានដកខ្លួនឃ្លាតឆ្ងាយពីវិស័យភាពយន្ត ដោយកាន់តែពង្រឹងលើមុខជំនួញផ្នែកអចលនទ្រព្យរបស់លោក តែអតីតតារាប្រុសរូបនេះ នៅតែមើលទៅឃើញស្អាតសង្ហា ទើបតែរូបថតដែលលោកបង្ហោះថ្មីៗនេះប៉ុណ្ណោះ ឃើញថាបាក់រូបបាក់ឆោមខ្លាំងស្ទើរតែមើលមិនចង់ស្គាល់ ៕