បះសក់! តន់ ចន្ទសីម៉ា បង្ហាញខ្លួនក្នុងកម្មវិធីម្តងស៉ីថ្លៃ ២ ម៉ឺនដុល្លារ
បច្ចុប្បន្ន បើនិយាយពីលំដាប់នៃប្រជាប្រិយភាពរបស់តារាចម្រៀងវ័យក្មេង តន់ ចន្ទសីម៉ា ដែលមហាជនអ្នកគាំទ្របានដឹងថា ជាគ្រាប់ពេជ្ររបស់ផលិតកម្ម ហ្គាឡាក់ស៊ី ណាវ៉ាត់ត្រា នោះ គឺកំពុងហក់ចូលជាលំដាប់តារាចម្រៀងស្រីជួរមុខវ័យក្មេងនៅក្នុងប្រទេសកម្ពុជា ។
គេបានដឹងថា តន់ ចន្ទសីម៉ា ក្រោយពីបានចាប់ផ្តើមបង្ហាញខ្លួនក្នុងកម្មវិធីប្រកួតចម្រៀងមួយ និង បោះជំហានដំបូងក្លាយទៅជាតារាចម្រៀងអាជីពប្រចាំផលិតកម្ម ហ្គាឡាក់ស៊ី ណាវ៉ាត់ត្រា តែម្តង ។ លើសពីនោះ រយៈពេលមិនដល់មួយឆ្នាំគ្រាប់ពេជ្រប្រចាំផលិតកម្មខាងលើនេះ បានបង្ហាញស្នាដៃច្រៀង បទចម្រៀងរបស់នាងនៅក្នុងឆ្នាំ ២០២០ នេះ មានអ្នកចូលទស្សនា ៤០០ លានដង ។
តួយ៉ាង ថ្មីៗនេះមានការលេចឮដំណឹងថា តន់ ចន្ទសីម៉ា ត្រូវបានក្រុមហ៊ុន និង ផលិតកម្ម ហ្គាឡាក់ស៊ី ណាវ៉ាត់ត្រា កំណត់តម្លៃនៃការបង្ហាញខ្លួនតាមការច្រៀង ក្នុងកម្មវិធីប្រគុំតន្ត្រី គឺនាងស៊ីថ្លៃចំនួន ៥ ពាន់ដុល្លារ រីឯ ក្នុងកម្មវិធីជប់លៀង មង្គលការ នានា គឺ ចំនួន ២ ម៉ឺនដុល្លារ ឯនោះ ។
តបទៅនឹងការលេចឮខាងលើ អ្នកគ្រប់គ្រង និង ជាអ្នកនិពន្ធប្រចាំផលិតកម្ម ហ្គាឡាក់ស៊ី ណាវ៉ាត់ត្រា លោក យឹម តាស្រង់ បានឲ្យដឹងថា «តម្លៃខាងលើនេះ គឺជាការពិតសម្រាប់ការចេញច្រៀងម្តងៗរបស់ តន់ ចន្ទសីម៉ា ដែលស័ក្តសមទៅនឹងប្រជាប្រិយភាពរបស់នាងក្នុងពេលបច្ចុប្បន្ន » ។
លោក យឹម តាស្រង់ បានបន្ថែមទៀតថា « តម្លៃខ្ពស់នេះដែរ គឺខាងក្រុមហ៊ុន និង ផលិតកម្មជាអ្នកកំណត់ឲ្យតារាស្រីរូបនេះ ហើយបច្ចុប្បន្នមានក្រុមហ៊ុនមួយចំនួនក៏បានហ៊ានផ្តល់តម្លៃនេះឲ្យនាងផងដែរ » ។
គូរឲ្យដឹងទៀតថា ថ្មីៗនេះ តន់ ចន្ទសីម៉ា ក៏បានចូលរួមថតស្បតពាណិជ្ជកម្មឲ្យក្រុមហ៊ុនប្រព័ន្ធទូរស័ព្ទដៃធំមួយក្នុងប្រទេសកម្ពុជា ហើយនាពេលខាងមុខ តន់ ចន្ទសីម៉ា នឹងក្លាយជា Brand Ambassador របស់ក្រុមហ៊ុន ២ ទៀតផងដែរ ៕