មានអាយុទើប ១៨ ឆ្នាំ យុវជនឈ្មោះ Lalit Patidar រស់នៅរដ្ឋ Madhya Pradesh ប្រទេសឥណ្ឌា ទទួលបានការទទួលស្គាល់ជាសកលជាមួយនឹងលក្ខណៈពិសេសរបស់លោកគឺ រោមដុះលើកមុខច្រើនជាងគេលើពិភពលោក។
ជាក់ស្តែង ដោយសាររោមដុះលើមុខរហូតដល់ទៅ ៩៥ % លោកត្រូវបានជាប់កំណត់ត្រាពិភពលោក Guinness World Records ជាបុរស ដែលមានរោមនៅលើមុខច្រើនជាងគេបំផុតនៅក្នុងពិភពលោក។
ករណីរោមដុះពេញមុខ Lalit Patidar លោកត្រូវបានរងពីជំងឺម្យ៉ាងហៅថា hypertrichosis ជាស្ថានភាពវេជ្ជសាស្ត្រដ៏កម្រមួយ ដែលធ្វើឱ្យរោមលូតលាស់លើកម្រិតនៅតំបន់មិនធម្មតាលើរាងកាយ។ ជាធម្មតាវាត្រូវបានគេស្គាល់ជារោគសញ្ញា werewolf syndrome ជាស្ថានភាពធ្វើឱ្យរំខានដល់ជីវិតប្រចាំថ្ងៃ។
នៅក្នុងកិច្ចសម្ភាសជាមួយ កំណត់ត្រាពិភពលោក Guinness World Records លោកបានចែករំលែកថា មនុស្សជុំវិញខ្លួនពេលឃើញលោកដំបូង គឺមានអារម្មណ៍ខ្លាចលោកជាខ្លាំង ប៉ុន្តែពេលបានស្គាល់លោក ពួកគេដឹងច្បាស់ថាលោកគឺមិនខុសពីអ្នកដទៃឡើយ។
មុនពេលជាប់កំណត់ត្រាពិភពលោក យុវជនរោមមុខ Lalit Patidar បានធ្វើដំណើរទៅកាន់ទីក្រុង Milan ប្រទេសអ៊ីតាលី ដើម្បីបង្ហាញខ្លួននៅក្នុងកម្មវិធីទូរទស្សន៍ ជាកន្លែងដែលលោកបានធ្វើការពិសោធរោមមុខជាផ្លូវការ។ មុនពេលក្លាយជាម្ចាស់កំណត់ត្រា អ្នកជំនាញខាងរោមបានធ្វើការកោររោមមុខផ្នែកតូចៗរបស់លោកយ៉ាងប្រុងប្រយ័ត្ន រួចវាស់វែងប្រវែងយ៉ាងត្រឹមត្រូវ។ ហើយទីបំផុតដំណើរផ្ទៀងផ្ទាត់ក៏បានសម្រេច លោកក៏ត្រូវបានប្រគល់តំណែងកំណត់ត្រាពិភពលោកតែម្តង៕
ប្រភព៖ ET
