ផ្ដាច់ខ្លួនពីសិល្បៈយូរឆ្នាំ ស៊ិន ស្រីរ័ត្ន អតីតតួឯកស្រីរឿង «បង្គងវល្លិ៍មាស» សំងំបើកជំនួញជាហាងអាហារ កំពុងកាក់កបខ្លាំង

បើរំឭកកាលប្រមាណជាជិត ១០ ឆ្នាំមុន មហាជននិយមតាមដានទស្សនាទូរទស្សន៍បាយ័ន ច្បាស់ជាស្គាល់មកហើយនូវពិធីការិនីស្រស់សោភា អ្នកនាង ស៊ិន នារីរ័ត្ន ដែលមានឈ្មោះពិត ស៊ិន ស្រីរ័ត្ន។ កាលនោះ គេចាំបានថាពិធីការិនីរូបនេះបានកាន់កម្មវិធីកម្សាន្ត និង អប់រំជាច្រើន ដោយទទួលបានប្រជាប្រិយភាពយ៉ាងខ្លាំង។

ងាកត្រឡប់ក្រោយបន្តិច មុននឹងបោះជំហានក្លាយទៅជាពិធីការិនី អ្នកនាង ស៊ិន ស្រីរ័ត្ន ក៏ជាតារាសម្តែងមួយក្នុងចម្រៀងខារ៉ាអូខេ និង ភាពយន្តដែរ ដោយខ្សែភាពយន្តដំបូងដែលអ្នកនាងទទួលបានការចាប់អារម្មណ៍ និង ស្គាល់ច្បាស់គឺរឿងអប់រំ «បង្គងវល្លិ៍មាស» ដោយអ្នកនាងសម្តែងជាតួឯក។

ងាកមកកាន់បច្ចុប្បន្នភាពរបស់អ្នកនាង ស៊ិន ស្រីរ័ត្ន ឯណោះវិញ ក្រោយពីរៀបការសាងគ្រួសារកាលពីអំឡុងឆ្នាំ ២០១៧ អតីតពិធីការិនីរូបនេះ បានផ្តាច់ខ្លួនទាំងស្រុងពីសិល្បៈ ខណៈអ្នកនាងមមាញឹកខ្លាំង បន្ទាប់ពីបង្កើតអាជីវកម្មបើកហាងអាហារជប៉ុនក្រោយរៀបការមួយឆ្នាំ។ មិនត្រឹមតែប៉ុណ្ណោះ អ្នកនាងក៏រវល់ក្នុងនាមជាអ្នកម៉ាក់កូន ៤ និង ភរិយាល្អបំពេញតួនាទីមើលថែកូន និង ស្វាមីផងដែរ។

គិតត្រឹមឆ្នាំ ២០២៥ នេះ អ្នកនាង ស៊ិន ស្រីរ័ត្ន បានឈរឈ្មោះជាថៅកែហាងដល់ទៅ ៣ ហើយ ដោយរួមមាន ហាង Hokkaido Japanese BBQ & Sushi ចំនួន ២ កន្លែង និង ហាងសាច់អាំងថ្មីយីហោ SHACHO មួយកន្លែង ដែលទើបតែបើកកាលពីដើមខែតុលា ឆ្នាំ ២០២៥ កន្លងទៅនេះ៕