ថ្មីៗនេះ មានរឿងរ៉ាវប្តីប្រពន្ធមួយ ដោយប្តីកំរោលចូលរហូតដល់ថ្នាក់ហ៊ានលើកដៃចាក់សម្លាប់ប្រពន្ធ ព្រោះតែភ្លើងប្រចណ្ឌនឹងប្រពន្ធដែលត្រូវអ្នកលក់សាច់ជ្រូកនៅផ្សារចុះថ្លៃសាច់ជ្រូកឱ្យញយដងពេក។
តាមព័ត៌មានបានឱ្យដឹងថា រឿងរ៉ាវនេះបានកើតឡើងនៅទីក្រុង Songyuan ខេត្ត Jilin ប្រទេសចិន ដោយប្តីប្រពន្ធមួយគូនេះបានរួមរស់ជាមួយគ្នាជាង ៣០ ឆ្នាំទៅហើយ តែមួយរយៈក្រោយមក បុរសជាប្តីបានកើតការសង្ស័យថាប្រពន្ធបានលួចលាក់សហាយស្មន់ជាមួយនឹងបុរសជាអ្នកលក់សាច់ជ្រូកនៅផ្សារ ព្រោះតែឃើញគេចេះតែចុះថ្លៃសាច់ជ្រូកឱ្យប្រពន្ធរបស់ខ្លួនរហូត។
ការសង្ស័យនេះ បានបង្កឱ្យមានការទាស់ទែងគ្នាយ៉ាងខ្លាំងរវាងប្តីប្រពន្ធ រហូតបុរសជាប្តីលើកដៃចាក់ប្រពន្ធនៅក្នុងផ្ទះ បណ្តាលឱ្យនាងរបួសយ៉ាងធ្ងន់ធ្ងរ។ យ៉ាងណាមិញ នាងបែរជាមិនខឹងប្តីឡើយ នាងទទួលយកប្តីវិញ ហើយថែមទាំងមិនព្រមទៅមន្ទីរពេទ្យទៀត។ ទោះយ៉ាងណាក៏ដោយ បុរសជាប្តីត្រូវបានគេឃាត់ខ្លួន ហើយក៏បានសារភាពកំហុស ដែលចុងក្រោយបុរសនេះត្រូវតុលាការកាត់ទោសឱ្យជាប់ពន្ធធនាគារចំនួន ១០ ឆ្នាំ និង ៦ ខែ៕
ប្រភព៖ SCMP
