មហាជនអ្នកគាំទ្រតាមដានកម្មវិធីប្រឡងចម្រៀងលំដាប់ពិភពលោក Beat The Best បានស្គាល់ហើយពីកញ្ញា លីន សោម៉ា ជាម្ចាស់ពានរង្វាន់ Beat The Best រដូវកាលទី ២ ដែលបានប្រឡងប្រជែងដណ្ដើមពាននេះកាលពីឆ្នាំ ២០២៤ កន្លងទៅ។
រយៈពេលជាង ១ ឆ្នាំ ក្រោយលើកពាន Beat The Best រដូវកាលទី ២ កញ្ញា លីន សោម៉ា បានក្លាយជាតារាចម្រៀងពន្លកថ្មីវ័យក្មេងដ៏មានសមត្ថភាពមួយរូប ប្រចាំផលិតកម្មរស្មីហង្សមាស ដែលបានសាងប្រជាប្រិយរបស់ខ្លួនតាមរយៈស្នាដៃបទចម្រៀងថ្មីៗជាច្រើន។
ជាមួយនឹងសមត្ថភាពក្នុងស្នាដៃចម្រៀងថ្មីៗ សុទ្ធសឹងតែពេញនិយមទទួលបានការគាំទ្រខ្លាំងពីមហាជន ឃើញថា លីន សោម៉ា ក៏កាន់តែក្ដោបបានទីផ្សារសិល្បៈជាបន្តបន្ទាប់ តែងឃើញវត្តមានរបស់នាងលើឆាកតន្រ្តីឯកជន កម្មវិធីមង្គល ក៏ដូចជាការប្រគំតន្រ្តីលើទូរទស្សន៍ និង តាមបណ្ដាខេត្តផ្សេងៗ។
យ៉ាងណាមិញ បើនិយាយពីសមត្ថភាពទេពកោសល្យ និង ទឹកដមសំឡេងដ៏ពីរោះរបស់ម្ចាស់ពាន Beat The Best រដូវកាលទី ២ រូបនេះ គឺនាងមិនមែនទើបមានសមត្ថភាពខ្លាំងអាចដណ្ដើមបានពានរង្វាន់ Beat The Best រដូវកាលទី ២ នេះទេ តែនាងក៏ធ្លាប់មានបទពិសោធន៍ Cover ចម្រៀងជាច្រើន ព្រមទាំងធ្លាប់ឆ្លងកាត់ការប្រឡងម្ដងដែរ ក្នុងកម្មវិធី Cambodian Idol រដូវកាលទី ៣ ឆ្នាំ ២០១៧ ។ លើសពីនេះ លីន សោម៉ា ក៏ត្រូវបានមហាជនចាប់អារម្មណ៍សរសើរខ្លាំង ខណៈបានឃើញវីដេអូមួយ ដែលនាងមានសមត្ថភាព និង ទឹកដមសំឡេងពីរោះអាចឡើងច្រៀងលើឆាកតន្រ្តីក្នុងទូរទស្សន៍តាំងពីនៅតូចច្រមក់ៗទៀតផង៕
សូមចុចទីនេះដើម្បីទស្សនាវីដេអូ៖
