រឿងរ៉ាវរបស់លោកវេជ្ជបណ្ឌិតវ័យ ៩៣ ឆ្នាំម្នាក់នៅក្រុង Melbourne ប្រទេសអូស្ត្រាលី កំពុងទទួលបានការចាប់អារម្មណ៍ពាសពេញបណ្ដាញសង្គម នៅពេលលោកតា និង ភរិយា វ័យខុសគ្នាជាង ៥០ ឆ្នាំ ទទួលស្វាគមន៍កូនប្រុសពូជដំបូងជាមួយគ្នា កាលពីឆ្នាំ ២០២៤ កន្លងទៅ ដោយលោកតានិយាយទាំងរីករាយថា ត្រៀមខ្លួនរួចរាល់នឹងយកកូនបន្ថែមទៀត។
លោកវេជ្ជបណ្ឌិត John Levin កើតក្នុងឆ្នាំ ១៩៣០ និង ភរិយារបស់លោកឈ្មោះ Yanying Lu អាយុ ៣៧ ឆ្នាំ បានស្វាគមន៍កំណើតកូនប្រុសដំបូងរបស់ពួកគេឈ្មោះ Gabby កាលពីខែកុម្ភៈ ឆ្នាំ ២០២៤ កន្លងទៅ។ តាមពិតទៅ លោកតា Levin គឺធ្លាប់មានភរិយាម្ដងរួចមកហើយ ដោយលោកតា និង ភរិយាដំបូងទទួលបានចំណងដៃកូនចំនួន ៣ នាក់ជាមួយគ្នា។ យ៉ាងណាមិញ ភរិយាលោកតាបានទទួលមរណភាពទៅក្នុងឆ្នាំ ២០១៣ ក្រោយរួមរស់ជាមួយគ្នាបាន ៥៧ ឆ្នាំ ហើយក្នុងចំណោមកូនទាំង ៣ នាក់របស់លោកតា ក៏មានម្នាក់បានទទួលមរណភាពក្នុងវ័យ ៦៥ ឆ្នាំ។
ខណៈរងការសោកសង្រេងដោយការបាត់បង់មនុស្សជាទីស្រឡាញ់ លោកតា Levin ក៏បានសម្រេចចិត្តទៅសិក្សាភាសាចិន ហើយពេលនោះហើយដែលលោកតាបានរកឃើញដៃគូជីវិតថ្មីជាគ្រូបង្រៀនផ្ទាល់។ លោកតា និង ភរិយាក្រោយនេះ បានរៀបការជាមួយគ្នានៅ Las Vegas ក្នុងឆ្នាំ ២០១៤។
គួររបញ្ជាក់ដែរថា កូនប្រុសក្រោយរបស់លោកតា Levis និង ភរិយា គឺឆ្លងកាត់ការបង្កកំណើតក្រៅស្បូន (IVF) ប៉ុន្តែទោះជាយ៉ាងណា លោកតា Levis រៀបរាប់ដោយក្ដីរំភើបថា៖ «ក្លាយជាឪពុកគេជាថ្មីម្ដងទៀតក្នុងវ័យនេះ គឺពិតជាអស្ចារ្យសឹងមិនគួរឱ្យជឿ»៕
