ឆ្មារោគចិត្ត ដើរពាំលីអូ និង ស្រោមជើងប្រុសៗមកទុកពេញផ្ទះ រហូតម្ចាស់ផ្ទះបិទប្រកាសរកម្ចាស់របស់វិញ

សត្វឆ្មាមួយក្បាលនៅប្រទេសនូវែលហ្សេឡង់ កំពុងផ្ទុះល្បីរឿងចូលចិត្តដើរលួចស្រោមជើង និង ខោក្នុងប្រុសៗ មកមកទុកពេញក្នុងផ្ទះ។ ឆ្មាក្បាលខូចមួយក្បាលនោះ មានឈ្មោះថា Brigit ជាឆ្មាពូជ Tonkinese អាយុ ៦ ឆ្នាំ បើតាមម្ចាស់បានឱ្យដឹងថា ក្នុងរយៈពេលជាង ២ ខែ Brigit បានដើរលួចខោក្នុងប្រុសៗបាន ១១ គូ និង ស្រោមជើងប្រមាណជាង ៥០ ស្រោម។

ថ្លែងប្រាប់សារព័ត៌មាន BBC ម្ចាស់ Brigit ឈ្មោះ Nathan បាននិយាយថា រឿងរ៉ាវចាប់ផ្ដើមនៅពេលដែលរូបនាងចាប់ផ្ដើមឃើញមានស្រោមជើង និង ខោក្នុងប្រុសៗនៅក្នុងកន្ត្រកដាក់ខោអាវរបស់នាង។ Nathan ប្រាប់ថា៖ «ពួកវាមិនមែនជារបស់នរណានៅក្នុងផ្ទះឡើយ ហើយថ្ងៃមួយ Brigit បានដើរកាត់ក្នុងផ្ទះដោយមាត់មានពាំស្រោមជើងមួយ»។

Nathan ក៏បានប្រាប់សារព័ត៌មាន New Zealand Herald ទៀតថា វាកាន់តែចម្លែក ដោយឆ្មារបស់នាងមើលទៅចាប់អារម្មណ៍តែលើខោក្នុង និង ស្រោមជើងមនុស្សប្រុសប៉ុណ្ណោះ។ របស់ដែល Brigit លួចពាំមកគឺច្រើនខ្លាំងរហូត Nathan និង ក្រុមគ្រួសារត្រូវចាប់ផ្ដើមព្រីនក្រដាសប្រកាសរកម្ចាស់ខោក្នុង និង ស្រោមជើងទាំងនោះវិញ៕

ប្រភព៖ 9GAG