ប្រសិនបើលោកអ្នកមានសំណាង ប្រហែលជាបានឃើញសត្វអំពិលអំពែកហើរជុំវិញនៅពេលយប់ ហើយបញ្ចេញនូវពន្លឺពណ៌បៃតងភ្លឺព្រាកៗយ៉ាងស្រស់ស្អាត។ តើលោកអ្នកដឹងទេថាសត្វទាំងនោះតាមពិតជាអ្វីទៅ?
តាមរយៈការចែករំលែកពី Angkor Centre for Conservation of Biodiversity នាពេលថ្មីៗនេះបានឱ្យដឹងថា អំពិលអំពែក តាមពិតគឺជាសត្វដូចគ្នានឹង «ដង្កូវអំពិលអំពែក» ប៉ុន្តែមានតែឈ្មោលប៉ុណ្ណោះ ដែលអាចហើរបាន ហើយត្រូវបានគេស្គាល់ថាជាអំពិលអំពែក ចំណែកឯសត្វញី (ដូចបង្ហាញនៅរូបខាងក្រោមនេះ) ត្រូវបានគេស្គាល់ថាជា «ដង្កូវអំពិលអំពែក» វិញ។
តាមប្រភពបានបន្តឱ្យដឹងថា តាមពិតសត្វទាំងនេះមិនមែនជាដង្កូវ ឬ រុយទេ ប៉ុន្តែជាប្រភេទសត្វល្អិតពពួកកញ្ចែ ទាំងញី ទាំងឈ្មោល មានសរីរាង្គបង្កើតពន្លឺនៅផ្នែកចុងពោះរបស់ពួកវា ដែលពន្លឺនេះត្រូវបានបង្កើតឡើងដោយប្រតិកម្មគីមី ហើយត្រូវបានគេស្គាល់ថាជា «ជីវពន្លឺ»។ ពន្លឺជួយឱ្យញី និង ឈ្មោល រកគ្នាឃើញនៅក្នុងព្រៃក្រាស់ៗ ដូច្នេះពួកវាអាចរួមរស់ជាមួយគ្នា និង បន្តពូជបានល្អ ដោយសារពួកវារស់នៅបានតែពីរបីសប្តាហ៍ប៉ុណ្ណោះបន្ទាប់ពីពួកវាពេញវ័យ។ សត្វប្រភេទនេះផងដែរ ជាសត្វរំពាស៊ីខ្យងគោកតាមព្រៃដ៏មានសារសំខាន់ណាស់ ដោយដេញសត្វល្អិតចង្រៃផ្សេងៗដែលមកបំផ្លាញដំណាំរបស់អ្នកភូមិ៕
